ଭୋପାଲ: ସୁଷମ ଖାଦ୍ୟ ଖାଇବେ । ଭଲ ପାଠ ପଢିବେ । ଶିକ୍ଷାକ୍ଷେତ୍ରରେ ଅନ୍ୟ ଦେଶକୁ ଟକ୍କର ଦେବୁ । ଏଭଳି ବହୁ ଉଦେଶ୍ୟ ନେଇ କେନ୍ଦ୍ର ସରକାର ତିଆରି କରିଛନ୍ତି ପୁଳାପୁଳା ଯୋଜନା । କିନ୍ତୁ ମଧ୍ୟପ୍ରଦେଶର ଏହି ସ୍କୁଲର ଦୃଶ୍ୟ ଦେଖିଲେ ଲାଗିବ ଯେପରି ସରକାରଙ୍କ ବ୍ୟବସ୍ଥା ନଳା ପାଣିରେ ଭାସୁଛି ।
ବିଦ୍ୟାର୍ଥୀଙ୍କ ସ୍ବାସ୍ଥ୍ୟକୁ ଆଖି ଆଗରେ ରଖି ମଧ୍ୟପ୍ରଦେଶ ସାଗର ଅଞ୍ଚଳର ମାକରୋନିଆ କନ୍ୟା ହାଇସ୍କୁଲ ବିଦ୍ୟାଳୟରେ ଦିଆଯାଉଛି ମଧ୍ୟାହ୍ନ ଭୋଜନ । ହେଲେ ଖାଇବା ପରେ ନାଳ ନର୍ଦ୍ଦମା ପାଣିରେ ପ୍ଲେଟ ସଫା କରୁଛନ୍ତି ପିଲେ । ଏଭଳି ଏକ ଭିଡିଓ ସାମନାକୁ ଆସିଛି । ଏହି ଚିତ୍ରକୁ ଦେଖିଲେ ସ୍ବଚ୍ଛତାର ନାରା ଦେଉଥିବା ସରକାରଙ୍କ ବ୍ୟବସ୍ଥା ଆପଣଙ୍କ ଆଗରେ ।
ନିୟମ ଅନୁଯାୟୀ ମଧ୍ୟାହ୍ନ ଭୋଜନ ପରେ ପ୍ଲେଟ ସଫା କରିବା ଦାୟିତ୍ବ ସ୍କୁଲ କର୍ତ୍ତୃପକ୍ଷଙ୍କର ହୋଇଥାଏ । ହେଲେ ଏଠାରେ ଛାତ୍ରଛାତ୍ରୀଙ୍କୁ ପ୍ଲେଟ ଧୋଇବାକୁ ବାଧ୍ୟ କରାଯାଉଥିବା ଅଭିଯୋଗ ଆସିଛି । ଏହି ଘଟଣା ସାମ୍ନାକୁ ଆସିବା ପରେ ଏକ ମାମଲା ଦାୟାର ହୋଇଛି । ସମ୍ପୃକ୍ତ ଅଧିକାରୀ ଘଟଣାର ତଦନ୍ତ ପରେ ଉଚିତ ପଦକ୍ଷେପ ନେବେ ବୋଲି ପ୍ରତିଶୃତି ଦେଇଛନ୍ତି ।
