ଭୁବନେଶ୍ବର: ଅନ୍ତର୍ଜୀତିୟ ସ୍ତରରେ ଓଡିଶାକୁ ଆଉ ଏକ ସଫଳତା । ସମ୍ବଲପୁରୀ ହସ୍ତତନ୍ତକୁ ଆଉ ଏକ ସମ୍ମାନ । ଯାହା ଏବେ ସମ୍ବଲପୁରୀ ହସ୍ତତନ୍ତ କଳାକୁ ନୂଆ ଆଶା ଦିଶା ଦେବା ନିଶ୍ଚିତ ।
ବିଶ୍ବସ୍ତରରେ ପରିଚିତ ‘ଡିଜିନ’ ପତ୍ରିକାରେ ସ୍ଥାନ ପାଇଲା ଓଡିଶାର କୃଷି ଭବନ । ଏଭଳି କୃତିତ୍ୱ ହାସଲ କରିବାରେ କୃଷି ଭବନ ହେଉଛି ଦେଶର ପ୍ରଥମ ସରକାରୀ ବିଲ୍ଡିଂ । ଯାହା ଏବେ ରାଜ୍ୟ ପାଇଁ ଗର୍ବର ବିଷୟ । ଦେଶରେ ଥିବା ସମସ୍ତ ସରକାରୀ କୋଠା ମଧ୍ୟରୁ ରାଜ୍ୟ କୃଷି ଭବନ ଅନ୍ଯତମ । କାରଣ ଏଠାର କୌଣସି ହସ୍ତକଳାକୁ ନିଖୂଣ ଭାବେ ସ୍ଥାପିତ କରାଯାଇଛି । ପ୍ରସିଦ୍ଧ ସମ୍ବଲପୁରୀ ଶାଢୀ ବାନ୍ଧର ପ୍ରତ୍ୟେକ କଳାକୁ ଏହି କୋଠାରେ ଦର୍ଶାଯାଇଛି । ଯାହା ସମ୍ବଲପୁରୀ ହସ୍ତତନ୍ତ କଳାର ଗୌରବ ବହନ କରୁଛି ।
ପୁଣି ବର୍ତ୍ତମାନ ଲଣ୍ଡନରେ ପ୍ରକାଶିତ ‘ଡିଜିନ’ ପତ୍ରିକାରେ ରାଜ୍ୟ ସରକାରଙ୍କ କୃଷି ଭବନ ସ୍ଥାନ ପାଇବା ପରେ ରାଜ୍ୟ ସରକାର ଓ ଅଧିକାରୀ ମାନେ ଖୁସି ବ୍ଯକ୍ତ କରିଛନ୍ତି । ମୁଖ୍ୟମନ୍ତ୍ରୀ ମଧ୍ୟ ଟ୍ବିଟ କରି ଖୁସି ଜାହିର କରିବା ସହ ରାଜ୍ୟକୁ ନୂଆ ପରିଚୟ ଦେବ ବୋଲି କହିଛନ୍ତି । ସେପଟେ କୃଷିମନ୍ତ୍ରୀ ଅରୁଣ ସାହୁ ମଧ୍ୟ ମୁଖ୍ୟମନ୍ତ୍ରୀଙ୍କୁ ଶ୍ରେୟ ଦେଇ ମୁଖ୍ୟମନ୍ତ୍ରୀଙ୍କ କଳାପ୍ରତି ଦୁର୍ବଳତା ବଳିଷ୍ଠ ନେତୃତ୍ବ ପାଇଁ ଏହା ସମ୍ଭବ ବୋଲି କହିଛନ୍ତି ।
ସୂଚନାଯୋଗ୍ୟ ଯେ ଓଡିଶା ପୂର୍ବରୁ ୪ ଥର କୃଷି କର୍ମଣ ପୁରଷ୍କାର ପାଇଥିଲା । ସେହି କୃଷି କର୍ମଣ ପୁରଷ୍କାର ରାଷୀରେ ଏହି କୃଷି ଭବନ ନିର୍ମାଣ କରାଯାଇଛି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
