ପାଟନା: ନିର୍ବାଚନୀ ସଭା ଚାଲିଥିବାବେଳେ ହଠାତ ଭାଙ୍ଗିଲା ମଞ୍ଚ । ବିହାରର ପଶ୍ଚିମ ଚମ୍ପାରନ ରାମନଗର ବିଧାନସଭା କ୍ଷେତ୍ର ଓ ନରକଟିଆଗଞ୍ଜ ବିଧାନସଭା କ୍ଷେତ୍ର ମଧ୍ୟରେ ଥିବା ବଗହୀ ଦେବରାଜରେ କଂଗ୍ରେସର ଏକ ନିର୍ବାଚନୀ ସଭା ଚାଲିଥିବାବେଳେ ହଠାତ ମଞ୍ଚ ଭାଙ୍ଗିଯାଇଥିବା ଦେଖିବାକୁ ମିଳିଛି । ମଞ୍ଚ ଭାଙ୍ଗି ପଡିବା ପରେ ସଭାରେ ଲୋକଙ୍କ ମଧ୍ୟରେ ଦୌଡାଦୌଡି ଦେଖିବାକୁ ମିଳିଥିଲା ।
କଂଗ୍ରେସ ନେତା ମସହୁର ସାୟର ଇମ୍ରାନ ପ୍ରତାପଗଡି ଓ ଅଖିଳେସ ସିଂ ମଞ୍ଚ ଉପରେ ଉପସ୍ଥିତ ରହି ଜନ ସଭାକୁ ସମ୍ବୋଧିତ କରୁଥିବାବେଳେ ଏପରି ଅଭାବନୀୟ ପରିସ୍ଥିତି ଦେଖିବାକୁ ମିଳିଛି । ଇମ୍ରାନ ପ୍ରତାପଗଡି ସଭାକୁ ସମ୍ବୋଧିତ କରୁଥିବାବେଳେ ହଠାତ ଭୁଷୁଡି ପଡିଥିଲା ମଞ୍ଚ ।
ତେବେ ମଞ୍ଚ ଭାଙ୍ଗିବାର କାରଣ ଜଣା ପଡିନଥିବାବେଳେ ମାତ୍ରାଧିକ ଭିଡ ହେତୁ ଏପରି ହୋଇଥିବା ଅନୁମାନ କରାଯାଉଛି । ଏହା ପରେ ସଭା କାର୍ଯ୍ୟକ୍ରମକୁ ସେହିଠାରେ ହିଁ ବନ୍ଦ କରିବାକୁ ପଡିଥିଲା । ଘଟଣାସ୍ଥଳରୁ ସବୁ ନେତାଙ୍କୁ ତୁରନ୍ତ ଅନ୍ୟତ୍ର ସ୍ଥାନାନ୍ତରିତ କରାଯିବା ସହ ସଭାସ୍ଥଳକୁ ଖାଲି କରିଥିଲେ ଆୟୋଜକ । ଏଥିରେ କେହି ମୃତାହତ ହୋଇଥିବାର ସୂଚନା ନଥିବା ଜଣାପଡିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
