ବେଙ୍ଗାଲୁରୁ: କର୍ଣ୍ଣାଟକରେ ଏକ ଅମାନବୀୟ ଦୃଶ୍ୟ ସାମ୍ନାକୁ ଆସିଛି । କୋରୋନା ସଂକ୍ରମଣ ଡରରେ କିଛି ଲୋକ ଅନ୍ତିମ ସଂସ୍କାରରେ ସାମିଲ ହେଉନାହାନ୍ତି । ଏହିପରି ଏକ ଘଟଣା ଦେଖିବାକୁ ମିଳିଛି କର୍ଣ୍ଣାଟକରେ । ତେବେ ସମ୍ପର୍କୀୟଙ୍କ ଅନୁପସ୍ଥିରେ ଜଣେ ଅସହାୟ ପୁଅ ନିଜ ବାପାଙ୍କ ମୃତଦେହକୁ ଟଲିରେ ଅନ୍ତିମ ସଂସ୍କାର ପାଇଁ ନେଉଥିବା ଦୃଶ୍ୟ ଦେଖିବାକୁ ମିଳିଛି ।
ସଦାଶିବ ନାମକ ଜଣେ ବ୍ୟକ୍ତି କର୍ଣ୍ଣାଟକର ବେଲାଗଭି ଜିଲ୍ଲାର ଅଥାନୀ ଅଞ୍ଚଳର ବାସିନ୍ଦା ଥିଲେ । ସେ ଗତ ଏକ ମାସ ହେବ ଅସୁସ୍ଥ ଥିଲେ । ମାତ୍ର ଶୁକ୍ରବାର ତାଙ୍କର ମୃତ୍ୟୁ ଘଟିଥିଲା । ତେବେ କୋରୋନା ଡରରେ ତାଙ୍କ ଅନ୍ତିମ ସଂସ୍କାରରେ ଯୋଗ ଦେବା ନିମନ୍ତେ କେହି ସମ୍ପର୍କୀୟ ଆସିନଥିଲେ । ଶେଷରେ ବାପାଙ୍କ ମୃତଦେହକୁ ଟଲିରେ ନେଇ ଅନ୍ତିମ ସଂସ୍କାର କରିବାକୁ ପୁଅ ନିଷ୍ପତ୍ତି ନେଇଥିଲେ ।
ଶେଷରେ ଟଲିରେ ମାଆ ଏବଂ ପୁଅ ମିଶି ସଦାଶିବଙ୍କ ମୃତଦେହକୁ ବୋହି ନେଉଥିବା ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ତେବେ ଏହି ଘଟଣା ଲୋକଙ୍କ ମାନବିକତା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
