ନୂଆଦିଲ୍ଲୀ: ଚଳିତ ଲୋକସଭା ନିର୍ବାଚନରେ ବିଜେପି ପୁଣି ନିଜ ଶାସନ ଗାଦିକୁ ଫେରିଛି । ସେପଟେ ଦେଶର ଅଧିକାଂଶ ସ୍ଥାନରେ ବିଜେପି ଭଲ ପ୍ରଦର୍ଶନ କରିଥିବା ବେଳେ ବିଜେପି ନେତାମାନେ ନିଜ ନିଜର ପଦ ପାଇଁ କେନ୍ଦ୍ରକୁ ଦାବି କରୁଛନ୍ତି । ଏହିକ୍ରମରେ ସାମିଲ ହୋଇଛି ଶିବସେନା । କେନ୍ଦ୍ର ଏବଂ ମହାରାଷ୍ଟ୍ରର ବିଜେପିରେ ସାମିଲ ଶିବସେନାରୁ ଲୋକସଭା ଉପ-ବାଚସ୍ପତି ପଦ ଦାବି କରାଯାଇଛି । ଏନେଇ ରାଜ୍ୟସଭା ସାଂସଦ ସଞ୍ଜୟ ରାଉତ କହିଛନ୍ତି ଏଭଳି ଦାବି କରିବା ଆମର ଅଧିକାର ଅଛି ।
ସଞ୍ଜୟ ରାଉତ କହିଛନ୍ତି, ‘ଉପାଧ୍ୟକ୍ଷ ପଦ ପାଇଁ ଏହା ଏକ ଦାବି ନୁହେଁ ବରଂ ଏହା ଆମ ଅଧିକାର । ଆମର 18 ସାଂସଦ ଅଛନ୍ତି । ଏହି ପଦ ଶିବସେନା ଖାତାରେ ଆସିବା ଆବଶ୍ୟକ । ଆମେ ମହାରାଷ୍ଟ୍ରରେ ବିଜେପି ସହ ମେଣ୍ଟ କରି ନିର୍ବାଚନ ଲଢିଛୁ ।’ ସୂଚନା ଅନୁସାରେ ଲୋକସଭା ନିର୍ବାଚନରେ ବିଜେପି ଏବଂ ଶିବସେନା ମେଣ୍ଟ ନିର୍ବାଚନ ଲଢିଛନ୍ତି । ସମୁଦାୟ 48 ଆସନରେ ଶିବସେନା 18 ଏବଂ ବିଜେପି 23 ଆସନରେ ବିଜୟ ହାସଲ କରିଛି ।
ମୋଦି କ୍ୟାବିନେଟରେ ଶିବସେନାଙ୍କ କୋଟା ଜରିଆରେ ଜଣଙ୍କୁ ମନ୍ତ୍ରୀ ପଦ ମିଳିଛି । ଶିବସେନା ସାଂସଦ ଅରବିନ୍ଦ ସାୱନ୍ତଙ୍କୁ ଭାରି ଶିଳ୍ପ ମନ୍ତ୍ରାଳୟ ପଦବୀ ଦିଆଯାଇଛି । ଏବେ ଶିବସେନା ଉପ-ବାଚସ୍ପତି ପଦ ପାଇଁ ଦାବି କରିଛନ୍ତି ।
