ମୁମ୍ବାଇ: ମହାରାଷ୍ଟ୍ର ବିଧାନସଭା ନିର୍ବାଚନ ଫଳାଫଳ ବାହାରିବାର ଗୋଟିଏ ସପ୍ତାହ ବିତି ସାରିଲାଣି ହେଲେ ଏବେ ସୁଦ୍ଧା ଜାରି ରହିଛି ମୁଖ୍ୟମନ୍ତ୍ରୀ ପଦ ପାଇଁ ଛକାପଞ୍ଝା । ମୁଖ୍ୟମନ୍ତ୍ରୀ ପଦକୁ ପାଇଁ ବିଜେପି-ଶିବସେନା ଭିତରେ ଲଢେଇ ଚାଲିଥିବା ବେଳେ, ରାଜ୍ୟର ଅନ୍ୟ ଦୁଇ ମୁଖ୍ୟ ଦଳ କଂଗ୍ରେସ ଓ ଏନସିପି ସରକାର ଗଢିବା ନେଇ ଚଳାଇଛନ୍ତି ମନ୍ତ୍ରଣା । ଏପରିକି ଶିବସେନାକୁ ସମର୍ଥନ ଦେଇ ସରକାର ଗଠନ ପାଇଁ ଏହି ଦୁଇ ଦଳଙ୍କ ପକ୍ଷରୁ ଦିଆଯାଇଛି ପ୍ରସ୍ତାବ।
ରାଜ୍ୟରେ ଚାଲିଥିବା ହାଇଭୋଲଟେଜ ପଲଟିକାଲ ଡ୍ରାମା ମଧ୍ୟରେ ଏକ ରୋଚକ ଖବର ସାମ୍ନାକୁ ଆସିଛି। ଆସନ୍ତା ସୋମବାର କଂଗ୍ରେସର ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧିଙ୍କୁ ଭେଟିବାକୁ ଯାଉଛନ୍ତି ଏନସିପି ମୁଖ୍ୟ ଶରଦ ପାୱାର ।
ତେବେ ଗତକାଲି ଦିଲ୍ଲୀରେ କଂଗ୍ରେସ ହାଇକମାଣ୍ଡଙ୍କୁ ଭେଟିଥିଲେ ମହାରାଷ୍ଟ୍ର କଂଗ୍ରେସ ନେତା । ଏହି ବୈଠକ ପରେ ଦଳର ଜଣେ ନେତା କହିଛନ୍ତି, "ଆପେକ୍ଷା କର ଓ ଦେଖ, ପରିସ୍ଥିତ କଣ ହେଉଛି, ଆମେ ବି କରୁଛୁ । କାରଣ ଆସନ୍ତା ନଭେମ୍ବର 4 ସୋମବାର ଦଳର ମୁଖିଆଙ୍କୁ ଭେଟିବାକୁ ଆସିପାରନ୍ତି ଏନସିପି ମୁଖ୍ୟ । ଏହି ବୈଠକ ପରେ ଚୂଡାନ୍ତ ହେବ ଆମେ ଶିବସେନକୁ ସମର୍ଥନ କରିବୁ କି ନାହିଁ । "
ଏଠାରେ ଉଲ୍ଲେଖ ଯୋଗ୍ୟ ଯେ ଶିବସେନା ୫୦-୫୦ ଫର୍ମୁଲାକୁ ନେଇ ଜିଦରେ ଅଟଳ ଥିବା ବେଳେ ଏହାକୁ ଖଣ୍ଡନ କରୁଛି ବିଜେପି । ଦଳର ମୁଖ୍ୟମନ୍ତ୍ରୀ ଚେହେରା ଦେବେନ୍ଦ୍ର ଫଡନାଭିସ୍ ଅଢେଇ ବର୍ଷିଆ ପ୍ରସ୍ତାବକୁ ଖଣ୍ଡନ କରି ସେ ପୁଣି ଥରେ ରାଜ୍ୟ ସରକାରର ନେତୃତ୍ବ ନେବେ ବୋଲି ଦୃଢୋକ୍ତି ପ୍ରକାଶ କରିଛନ୍ତି।
ଚଳିତ ବିଧାନସଭା ନିର୍ବାଚନ ଫଳାଫଳ ପରେ ୨୮୮ ସଦସ୍ୟ ବିଶିଷ୍ଟ ମହାରାଷ୍ଟ୍ର ବିଧାନସଭା ନିର୍ବାଚନରେ ବିଜେପି ୧୦୫ ଆସନ ଜିତିଛି । ଶିବସେନା ୫୬ଟି ଆସନରେ ବିଜୟୀ ହୋଇଥିଲା । ଏହାସହ ବିରୋଧୀ କଂଗ୍ରେସକୁ 44 ଓ ତାର ସହଯୋଗୀ ଏନସିପିକୁ 54ଟି ଆସନ ମିଳିଛି । ଏବେ ଶିବସେନା ସରକାର ଗଠନ କରିବ ପାଇଁ ଏନସିପି ଓ କଂଗ୍ରେସର ସମର୍ଥନ ଯୋଗାଡ କରିବା ଉପରେ ବିଚାରବିମର୍ଶ କରୁଛି ।
