ଚଣ୍ଡିଗଡ: ହରିୟାଣା ଫରିଦାବାଦ ଜିଲ୍ଲା ଅନ୍ତର୍ଗତ ମୋହନା ଗାଁରେ ଭାରତୀୟ ଧୁମନ୍ତୁ ସପେରା ବିକାଶ ମହାସଂଘ ପକ୍ଷରୁ ରାଜ୍ୟସ୍ତରୀୟ ଓପନ ସାଂସ୍କୃତିକ ପ୍ରତିଯୋଗିତାର ଆୟୋଜନ କରାଯାଇଛି । ଏହି କାର୍ଯ୍ୟକ୍ରମରେ ଦେଶର କୋଣ ଅନୁକୋଣରୁ ଶତାଧିକ ସାପୁଆ କେଳାମାନେ ଭାଗ ନେଇଛନ୍ତି । ସେମାନେ ଏତେ ସୁନ୍ଦର ତୁମ୍ବା ଓ ବିନ ବଜାଉଛନ୍ତି ଯେ, ଲୋକେ ନାଚିବାକୁ ବାଧ୍ୟ ହେଉଛନ୍ତି ।
ଏହି କାର୍ଯ୍ୟକ୍ରମ ଆୟୋଜନର ଉଦ୍ଦେଶ୍ୟ ହେଉଛି ବହୂ ପୂର୍ବରୁ ସାପୁଆ କେଳାମାନେ ତୁମ୍ବା ଓ ବିନ ବଜାଇ ଯେପରି ନିଜର ପେଟ ପୋଷୁଥିଲେ ତାହାକୁ ଲୋକଙ୍କ ମଧ୍ୟରେ ଜୀବିତ ରଖିବା । ମୋଟାମୋଟି ଭାବେ କହିବାକୁ ଗଲେ ଏହି ସଂସ୍କୃତିକୁ ବିଲୋପ ହେବାରୁ ରକ୍ଷା କରିବା ଏହି କାର୍ଯ୍ୟକ୍ରମର ଉଦ୍ଦେଶ୍ୟ । ତେବେ ଆୟୋଜିତ ଏହି କାର୍ଯ୍ୟକ୍ରମରେ ସପେରା ଜାତିର ଶିକ୍ଷିତ ପିଲାମାନଙ୍କୁ ସମ୍ମାନିତ ମଧ୍ୟ କରାଯାଉଛି ।
କାର୍ଯ୍ୟକ୍ରମରେ କେଳାମାନେ ଘଣ୍ଟା ଘଣ୍ଟା ଧରି ତୁମ୍ବା ଓ ବିନ ବଜାଇ ପ୍ରତିଯୋଗିତା କରିଥିଲେ । ପ୍ରତିଯୋଗିତାରେ ଦୂରଦୂରନ୍ତାରୁ ପହଞ୍ଚିଥିବା ସାପୁଆ କେଳା ଜାତିର ପଦାଧିକାରୀମାନେ କହିଛନ୍ତି ଯେ, ସରକାର ଓ୍ବାଇଲ୍ଡ ଆକ୍ଟ 1952 ଲଗାଇ ଆମର ରୋଜଗାର ବନ୍ଦ କରି ଦେଇଛନ୍ତି । ବିନ ବଜାଇ ଗାଁମାନଙ୍କରେ ସାପ ଦେଖାଇ ପେଟ ପୋଷୁଥିଲୁ ହେଲେ ସରକାର ତାହା ଆମଠାରୁ ଛଡେଇ ନେଇଛନ୍ତି । ଏହା ଆମର କୂଳ ବେଉସା ଥିଲା ।
ସେମାନଙ୍କର ଦାବି ହେଉଛି, 'ଜୁ' ବା ଚିଡିଆଖାନାମାନଙ୍କରେ ରହୁଥିବା ସାପମାନଙ୍କର ଦେଖାଶୁଣା କରିବା ପାଇଁ ଆମକୁ ଚାକିରି ଦିଆଯାଉ । ଯାହାଦ୍ବାରା ଆମକୁ ରୋଜଗାରର ପନ୍ଥା ମିଳିବା ସହିତ ସାପମାନଙ୍କର ମଧ୍ୟ ମୃତ୍ୟୁ ସଂଖ୍ୟା କମିବ ।
