ଭୋପାଳ: ବିବାଦୀୟ ବୟାନର ଅନ୍ୟନାମ ସାଧ୍ବୀ ପ୍ରଜ୍ଞା ସିଂହ ଠାକୁର । ସବୁବେଳେ ନିଜ ବିବାଦୀୟ ବୟାନ ଲାଗି ଚର୍ଚ୍ଚିତ ଭୋପାଳ ସାଂସଦ ପୁଣି ଦେଇଛନ୍ତି ଅଜବ ବୟାନ । ଆଉ ଏଥର ତାଙ୍କ ଟାର୍ଗେଟରେ ବିରୋଧୀ ଦଳ । ନିକଟରେ ବିଜେପି ନିଜର କିଛି ବରିଷ୍ଠ ତଥା ହେଭିୱେଟ ନେତାଙ୍କୁ ହରାଇଥିବାବେଳେ ଏଥିପାଇଁ ବିରୋଧୀଙ୍କୁ ଦାୟୀ କରିଛନ୍ତି ସାଧ୍ବୀ ।
ବିଜେପି ପ୍ରଦେଶ କାର୍ଯ୍ୟାଳୟରେ ଆୟୋଜିତ ଶ୍ରଦ୍ଧାଞ୍ଜଳି ସଭାରେ ଏହିପରି କିଛି ଘଟଣା ଘଟିଛି । ସ୍ବର୍ଗତଃ ବିଜେପି ନେତା ବାବୁଲାଲ ଗୌର ଏବଂ ଅରୁଣ ଜେଟଲୀଙ୍କ ଲାଗି ଏଠାରେ ଶ୍ରଦ୍ଧାଞ୍ଜଳି ସଭା ଆୟୋଜିତ ହୋଇଥିଲା । ଏଥିରେ ଯୋଗ ଦେଇ ସାଧ୍ବୀ ବିରୋଧୀଙ୍କୁ ଟାର୍ଗେଟ କରିଥିଲେ । ଉପସ୍ଥିତ ଗଣମାଧ୍ୟମ ପ୍ରତିନିଧିଙ୍କୁ ସେ କହିଥିଲେ ଯେ ଅସମୟରେ ବିଜେପି ନେତାଙ୍କ ନିଧନ ବିରୋଧୀଙ୍କ ଉପରେ ସନ୍ଦେହ ସୃଷ୍ଟି କରିଛି । ଲାଗୁଛି ବିରୋଧୀ ବିଜେପି ଉପରେ କିଛି କଳାଯାଦୁ ପ୍ରୟୋଗ କରିଛନ୍ତି ।
ଏହାକୁ ନେଇ ସେ ଏକ ଘଟଣା ଶୁଣାଇଥିଲେ । ସେ ଯେତେବେଳେ ଲୋକସଭା ନିର୍ବାଚନ ଲଢୁଥିଲେ ସେତେବେଳେ ଜଣେ ସାଧୁଙ୍କ ସଂସ୍ପର୍ଶରେ ଆସିଥିଲେ । ସେ ତାଙ୍କୁ କହିଥିଲେ ଯେ ଏବେ ବହୁତ ଖରାପ ସମୟ ଚାଲିଛି । ବିରୋଧୀ ଆପଣଙ୍କ ଦଳ ଓ ନେତାଙ୍କ ଲାଗି କିଛି କଳାବିଦ୍ୟାର ପ୍ରୟୋଗ କରୁଛନ୍ତି । ଏଥିପାଇଁ ଆପଣ ସାବଧାନ ରହନ୍ତୁ ଓ ଆପଣଙ୍କ ସାଧନାକୁ ବଢାଇ ଦିଅନ୍ତୁ ବୋଲି ଉକ୍ତ ସାଧୁ ତାଙ୍କୁ କହିଥିବା ସାଧ୍ବୀ କହିଥିଲେ ।
ଏହାସହ ପ୍ରଜ୍ଞା ଆହୁରି କହିଥିଲେ ଯେ ଏହାପରେ ସେ ଏହି କଥାକୁ ଭୁଲି ଯାଇଥିଲେ । କିନ୍ତୁ ଏବେ ଯେତେବେଳେ ଦଳ ଜଣକ ପରେ ଜଣେ ନେତାଙ୍କୁ ହରାଉଛି ଏବେ ତାଙ୍କୁ ଉକ୍ତ ସାଧୁଙ୍କ ସତର୍କବାଣୀ ମନେପଡୁଛି । ଆପଣ ବିଶ୍ବାସ କରନ୍ତୁ କି ନାହିଁ ଏହା ହିଁ ସତ୍ୟ ଏବଂ ଏହା ହିଁ ଘଟୁଛି । ପ୍ରକୃତରେ ବିରୋଧୀଙ୍କ କଳାଯାଦୁ ଆମ ଦଳ ଉପରେ ପଡୁଛି ବୋଲି ସାଧ୍ବୀ ସଭାରେ କହିଥିଲେ ।
ସୂଚନାଯୋଗ୍ୟ ଯେ ପୂର୍ବରୁ ନିଜ ବିବାଦୀୟ ବୟାନ ଯୋଗୁଁ ସେ ଅନେକ ସମୟରେ ଫସିଛନ୍ତି । ଏପରିକି ମୁମ୍ବାଇ ଆକ୍ରମଣରେ ଶହୀଦ ପୋଲିସଙ୍କୁ ଅପମାନ କରିବା ଯୋଗୁଁ ତାଙ୍କୁ ପ୍ରଧାନମନ୍ତ୍ରୀ ମୋଦି ମଧ୍ୟ ତାଗିଦ କରିଥିଲେ । କିନ୍ତୁ ଏସବୁର ପ୍ରଭାବ ସାଧ୍ବୀଙ୍କ ଉପରେ ପଡିନଥିବା ଲାଗୁଛି । ସ୍ବର୍ଗତଃ ନେତାଙ୍କ ଶ୍ରଦ୍ଧାଞ୍ଜଳି ସଭାରେ ଜଣେ ସାଂସଦ ଏପରି ଅଯଥା ମନ୍ତବ୍ୟ ଦେବା କେତେ ଦୂର ଯୁକ୍ତିଯୁକ୍ତ ବୋଲି ପ୍ରଶ୍ନ ଉଠୁଛି ।
