ଲକ୍ଷ୍ନୌ: କୋରୋନାର କାୟା ବିସ୍ତାର ମଧ୍ୟରେ ବଡ ଘୋଷଣା କରିଛନ୍ତି ଉତ୍ତରପ୍ରଦେଶର ଯୋଗୀ ସରକାର । କୋରୋନା ପାଇଁ କାମକୁ ଯାଇପାରୁନଥିବାରୁ ଦିନ ମଜୁରିଆଙ୍କୁ ମିଳିବ ଟଙ୍କା । ଦିନମଜୁରିଆଙ୍କ ପାଇଁ 1000ଟଙ୍କାର ଭତ୍ତା ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ସେହିପରି 20 ଲକ୍ଷ ନିର୍ମାଣ ଶ୍ରମିକଙ୍କୁ ମଧ୍ୟ ମିଳିବ 1000ଟଙ୍କାର ଭତ୍ତା ଅର୍ଥ ।
ଶ୍ରମ ବିଭାଗ ଅଧିନରେ 20 ଲକ୍ଷ 37 ହଜାର ପଞ୍ଜିକୃତ ଶ୍ରମିକ ରହିଛନ୍ତି । 15 ଲକ୍ଷ ସଫେଇ କର୍ମାଚାରୀଙ୍କ ଭରଣପୋଷଣ ପାଇଁ ସରକାର ହଜାରେ ଟଙ୍କା ଦେବେ ବୋଲି କହିଛନ୍ତି ମୁଖ୍ୟମନ୍ତ୍ରୀ ଯୋଗୀ । ଏହି ଟଙ୍କା ସିଧାସଳଖ ଶ୍ରମିକଙ୍କ ବ୍ୟାଙ୍କ ଆକାଉଣ୍ଟକୁ ଟ୍ରାନ୍ସଫର କରିଦିଆଯିବ । ତେବେ ଯୋଗୀଙ୍କ ଏହି ଘୋଷଣା ପରେ ଉତ୍ତରପ୍ରଦେଶର 35 ଲକ୍ଷ ଶ୍ରମିକଙ୍କୁ ଏହାର ଲାଭ ମିଳିବ ।
ସମସ୍ତଙ୍କ ମନରେ କୋରୋନାକୁ ନେଇ ଭୟ ରହିଛି । ଏପରି ସ୍ଥିତିରେ କାହାରିକୁ ବି ଘରୁ ନବାହାରିବାକୁ ପରାମର୍ଶ ଦିଆଯାଉଛି । ଏପରି ସ୍ଥିତିରେ ଶ୍ରମିକଙ୍କୁ ଯେପରି ଘର ଚଳାଇବାରେ ଅସୁବିଧା ନହୁଏ, ସେଥିପାଇଁ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଏପରି ପଦକ୍ଷେପ ନେଇଛନ୍ତି । ରାଜ୍ୟରେ ବର୍ତ୍ତମାନ ସୁଦ୍ଧା 26 ଜଣ କୋରୋନା ଦ୍ବାରା ଆକ୍ରାନ୍ତ ହୋଇସାରିଲେଣି । କୋରୋନା ସଙ୍କଟକୁ ଦୃଷ୍ଟିରେ ରଖି ମଲ, ସ୍କୁଲ, କଲେଜକୁ ବନ୍ଦ ରଖାଯାଇଛି ।
@ANI
