ନୂଆଦିଲ୍ଲୀ: ରିଲାଏନ୍ସ ଟାୱାର ଭଙ୍ଗାରୁଜା ମାମଲାରେ ପଞ୍ଜାବ ଓ ହରିୟାଣା ହାଇକୋର୍ଟ କେନ୍ଦ୍ର ଓ ପଞ୍ଜାବ ସରକାରଙ୍କୁ ନୋଟିସ ଦେଇଛନ୍ତି । ଟାୱାର ଭଙ୍ଗାରୁଜାକୁ ନେଇ ହାଇକୋର୍ଟ ଯାଇଥିଲା ରିଲାଏନ୍ସ ଜିଓ ଇନ୍ଫୋକମ୍ ଲିମିଟେଡ୍(ଆରଜେଆଇଏଲ) ।
ସୋମବାର, ଘଟଣାକୁ ନେଇ ଆରଜେଆଇଏଲ ପକ୍ଷରୁ ଯାଚିକା ଦାୟର କରାଯାଇଥିଲା । ଦୁର୍ବୃତ୍ତମାନଙ୍କ ଦ୍ବାରା ଟାୱାର ଭଙ୍ଗାରୁଜା ଘଟଣାରେ ସରକାର ହସ୍ତକ୍ଷେପ କରନ୍ତୁ ବୋଲି ଏଥିରେ ଦର୍ଶାଯାଇଥିଲା ।
ସୂଚନାଥାଉକି, ନୂଆ କୃଷି ଆଇନକୁ ବିରୋଧ କରି ପଞ୍ଜାବରେ ଅନେକ ଟାୱାରକୁ ନଷ୍ଟ କରିଦେଇଛନ୍ତି ଚାଷୀ । ଚାଷୀମାନେ ଟାୱାର ବିଦ୍ୟୁତ ସଂଯୋଗକୁ ବିଚ୍ଛିନ୍ନ କରିଛନ୍ତି। ଟାୱାର ଉପରକୁ ଯାଇଥିବା କେବୁଲ ତାରକୁ କାଟି ଦେଇଛନ୍ତି। ଯାହାକୁ ନେଇ କୋର୍ଟର ଦ୍ବାରସ୍ଥ ହୋଇଥିଲା ଆରଜେଆଇଏଲ ।
ଅନ୍ୟପଟେ ଦିଲ୍ଲୀ ସୀମାରେ ଚାଷୀମାନେ ଆଇନକୁ ବିରୋଧ କରି 41 ଦିନ ହେବ ଧାରଣାରେ ବସିଛନ୍ତି । ସରକାର ଏହାର ସମାଧାନ ପାଇଁ କୃଷକ ସଙ୍ଗଠନ ସହିତ 7 ଥର ବୈଠକ କରିଥିଲେ ମଧ୍ୟ କୌଣସି ନିଷ୍କର୍ସ ବାହାରି ନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
