ବେଙ୍ଗାଲୁରୁ: ମୁଖ୍ୟମନ୍ତ୍ରୀ ପଦରୁ କମଲନାଥଙ୍କ ଇସ୍ତଫା ପରେ ମଧ୍ୟପ୍ରଦେଶରେ ବିଜେପି ସାମ୍ନାରେ ସରକାର ଗଢିବାର ରାସ୍ତା ପରିଷ୍କାର ହୋଇସାରିଛି । ସେପଟେ କମଲନାଥ ସରକାର ଗଡିବାର ଗୋଟିଏ ଦିନ ପରେ ତଥାରବିବାର ବେଙ୍ଗାଲୁରୁ ଛାଡିଛନ୍ତି ମଧ୍ୟପ୍ରଦେଶ କଂଗ୍ରେସରୁ ଇସ୍ତଫା ଦେଇଥିବା 22 ବିଧାୟକ ।
କଂଗ୍ରେସରୁ ଜ୍ୟୋତିରାଦିତ୍ୟ ସିନ୍ଧିଆଙ୍କ ଇସ୍ତଫା ପରେ ମହାରାଜଙ୍କ ହାତଧରି ଗୋଟିଏ ପରେ ଗୋଟିଏ 22 ବିଧାୟକ କଂଗ୍ରେସର ହାତ ଛାଡିଦେଇଥିଲେ । ମଧ୍ୟପ୍ରଦେଶରେ ଜୀବନ ପ୍ରତି ବିପଦ ଥିବା ଦର୍ଶାଇ ବେଙ୍ଗାଲରୁରର ଏକ ରିସର୍ଟରେ ଅନେକ ଦିନରୁ ଡେରା ପକାଇଥିଲେ ଏହି 22 ବିଧାୟକ । ତେବେ ବହୁମତ ନଥିବା କାରଣରୁ ମୁଖ୍ୟମନ୍ତ୍ରୀ ପଦରୁ କମଲନାଥ ଇସ୍ତଫା ଦେବାପରେ ମଧ୍ୟପ୍ରଦେଶ ରାଜନୀତିରେ ଲାଗିରହିଥିବା ସସପେନ୍ସ ଉପରୁ ପରଦା ଉଠିଛି । ବେଙ୍ଗାଲୁରୁରେ ଥିବା ମଧ୍ୟପ୍ରଦେଶ 22 ବିଧାୟକ ରିସର୍ଟ ଛାଡି ମଧ୍ୟପ୍ରଦେଶ ଫେରୁଛନ୍ତି । ଏନେଇ ବେଙ୍ଗାଲୁରର ରିସର୍ଟ ବାହାରେ କଡା ସୁରକ୍ଷା ବ୍ୟବସ୍ଥା ଦେଖିବାକୁ ମିଳିଛି ।
କଂଗ୍ରେସ ଛାଡିଥିବା ଏହି 22 ବିଧାୟକଙ୍କୁ ବେଙ୍ଗାଲୁରରୁରେ ବିଜେପି ବନ୍ଦୀ କରି ରଖିଥିବା ଅଭିଯୋଗ କରିଥିଲେ କମଲନାଥ । ତେବେ ସେମାନଙ୍କୁ ବନ୍ଦୀ ମୁକ୍ତ କରିବା ପରେ ହିଁ ବହୁମତ ସାବ୍ୟସ୍ତ କରିବାକୁ ସେ କହିଥିଲେ । ହେଲେ ସୁପ୍ରିମକୋର୍ଟଙ୍କ ଆଦେଶ ପରେ କମଲନାଥଙ୍କୁ ନିଜର ପରାଜୟ ସ୍ବୀକାର କରିବା ସହ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବାକୁ ପଡିଥିଲା ।
@ANI
