ଡେରାଡୁନ: ଉତ୍ତରାଖଣ୍ଡର ଉତ୍ତରକାଶୀ ଜିଲ୍ଲାରେ ବୁଧବାର ବନ୍ୟାଅଞ୍ଚଳରେ ଏକ ହେଲିକପ୍ଟର ଉଦ୍ଧାର କାର୍ଯ୍ୟ କରୁଥିବାବେଳେ କ୍ରାସ ହୋଇଯାଇଥିଲା । ଏହି ଘଟଣାରେ ପାଇଲଟ, ଇଞ୍ଜିନିୟର ଓ ଏବିଏସନ କମ୍ପାନୀର ସ୍ଥାନୀୟ ପ୍ରବନ୍ଧକ ରାଜପାଲଙ୍କର ମୃତ୍ୟୁ ହୋଇଥିଲା । ଏହି ଘଟଣା ପୂର୍ବରୁ ରାଜପାଲ ଏକ ଫେସବୁକ ଲାଇଭ କରିଥିଲେ । ଯେଉଁଥିରେ ସେ କହିଥିଲେ ସେ ପାଇଲଟଙ୍କ ସହ ବନ୍ଯାଞ୍ଚଳକୁ ଉଦ୍ଧାର କାର୍ଯ୍ୟରେ ଯାଉଛନ୍ତି ରିଲିଫ ବଣ୍ଟନ କାର୍ଯ୍ୟରେ ।
ରାଜପାଲ ଏହି ଭିଡିଓ ହେଲିକପ୍ଟର ଉଡାଣ ଭରିବାର କିଛି ସମୟ ପରେ ତିଆରି କରିଥିଲେ । ସେ ରିଲିଫ ସାମଗ୍ରୀ ନେଇ ଡେରାଡୁନର ସହସ୍ତ୍ରଧାରା ହେଲିପ୍ୟାଡରୁ ଉତ୍ତରକାଶୀର ଆରାକୋଟ ମାକୁଡୀ ଅଞ୍ଚଳକୁ ଯାଇଥିଲା । ହେଲେ ରାଜପାଲଙ୍କୁ କଣ ଜଣା ଥିଲା ଏହା ତାଙ୍କ ଜୀବନର ଶେଷ ଭିଡିଓ ବୋଲି ।
ରବିବାର ଉତ୍ତରକାଶୀର ମୋରୀ ତହସିଲର ଆରାକୋଟ ଓ ତ୍ୟୁଣୀ ଅଞ୍ଚଳରେ ବାଦଲଫଟା ବର୍ଷା ହୋଇଥିଲା । ଯେଉଁଥିପାଇଁ ସେଠାରେ ବନ୍ୟା ସୃଷ୍ଟି ହୋଇଥିଲା । ଉଦ୍ଧାରକାର୍ଯ୍ୟ ଆଉ ରିଲିଫ ବଣ୍ଟନ ପାଇଁ 3ଟି ହେଲିକପ୍ଟର ରିଲିଫ ସାମଗ୍ରୀ ନେଇ ଯାଇଥିଲେ । ହେଲେ ଫେରିବା ବାଟରେ ଏକ ରୋପ ଓ୍ବେର ତାରରେ ତାଙ୍କ ହେଲିକପ୍ଟରଟି ଛନ୍ଦି ହୋଇ କ୍ରାସ ହୋଇଯାଇଥିଲା । ଯାହାଫଳରେ ହେଲିକପ୍ଟରରେ ଥିବା 3 ଜଣଙ୍କର ମୃତ୍ୟୁ ହୋଇଯାଇଥିଲା ।
