ନୂଆଦିଲ୍ଲୀ: ଆର୍ଥିକ ମାନ୍ଦାବସ୍ଥାକୁ ନେଇ ପୂର୍ବରୁ ହିଁ ସମାଲୋଚନାର ଶିକାର ହେଉଥିବା ମୋଦି ସରକାରଙ୍କ ଅର୍ଥନୀତିକୁ ଶୁକ୍ରବାର ଆଉ ଏକ ଶକ୍ତ ଝଟକା ଲାଗିଛି । ଦେଶର ଅଭିବୃଦ୍ଧି ହାର ପୁଣି ଖସିଛି । ଯାହାକୁ ନେଇ ମୋଦି ସରକାରଙ୍କୁ ଘେରିଛନ୍ତି ବିରୋଧୀ ଦଳ । ଜିଡିପି ହ୍ରାସକୁ ନେଇ ଟ୍ବିଟ କରି କେନ୍ଦ୍ରକୁ ସମାଲୋଚନା କରିଛନ୍ତି କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ।
ଜିଡିପି ଅଭିବୃଦ୍ଧି ହାରକୁ ନେଇ ପ୍ରିୟଙ୍କା ଗାନ୍ଧୀ କହିଛନ୍ତି, ‘ପ୍ରତିବର୍ଷ 2 କୋଟି ନିଯୁକ୍ତି ସୁଯୋଗ ଦିଆଯିବ, ଫସଲର ଦାମ ଦୁଇଗୁଣ ହେବ, ଭଲ ଦିନ ଆସିବ, ମେକ ଇନ ଇଣ୍ଡିଆ ହେବ, ଅର୍ଥ ବ୍ୟବସ୍ଥା 5 ଟ୍ରିଲିୟନ ଡଲାର ହେବ ବୋଲି ସରକାର ପ୍ରତିଶୃତି ଦେଇଥିଲେ । ହେଲେ ସରକାରଙ୍କ ସବୁ ପ୍ରତିଶୃତି ମିଥ୍ୟା ସାବ୍ୟସ୍ତ ହେଉଥିବା ଦେଖାଯାଉଛି । ଆଜି ଜିଡିପି ଅଭିବୃଦ୍ଧି ହାର 4.5 ପ୍ରତିଶତକୁ ଖସିଛି।’ ଏହା ସହିତ ମୋଦି ସରକାରଙ୍କୁ ତାଙ୍କର ସମସ୍ତ ପ୍ରତିଶ୍ରୃତିର ହିସାବ ମାଗିଛନ୍ତି ସେ।
ଚଳିତ ଆର୍ଥିକ ବର୍ଷର ଦ୍ବିତୀୟ ତ୍ରୈମାସ(ଜୁଲାଇ-ସେପ୍ଟେମ୍ବର)ରେ ଜିଡିପି ଅଭିବୃଦ୍ଧି ହାର 0.5 ପ୍ରତିଶତ ହ୍ରାସ ଘଟି 4.5 ପ୍ରତିଶତକୁ ପହଞ୍ଚିଛି। ଯାହାକି ସାଢେ 6 ବର୍ଷରେ ସର୍ବନିମ୍ନ।
