ନୂଆଦିଲ୍ଲୀ: ନିଜ ଦ୍ବିତୀୟ କାର୍ଯ୍ୟକାଳର ପ୍ରଥମ ବିଦେଶ ଯାତ୍ରାରେ ଅଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସେ ଗତକାଲି ମାଳଦ୍ୱୀପ ଗସ୍ତରେ ଯାଇଥିବା ବେଳେ ଆଜି ସେଠାରୁ ସିଧାସଳଖ ଶ୍ରୀଲଙ୍କା ପହଞ୍ଚିବେ । ତେବେ ଶ୍ରୀଲଙ୍କାରୁ ଭାରତ ଫେରିବା ପରେ ସେ ତିରୁପତି ସ୍ଥିତ ଭଗବାନ ଭେଙ୍କେଟେଶ୍ବରଙ୍କ ମନ୍ଦିରରେ ପୂଜାର୍ଚ୍ଚନା କରିବେ । ଏନେଇ ମନ୍ଦିରର ଜଣେ ଅଧିକାରୀ ସୂଚନା ଦେଇଛନ୍ତି ।
ମୋଦି ରବିବାର ସନ୍ଧ୍ୟାରେ କଲୋମ୍ବୋରୁ ତିରୁପତି ନିକଟସ୍ଥ ରେନିଗୁଣ୍ଟା ବିମାନବନ୍ଦରରେ ପହଞ୍ଚିବାର କାର୍ଯ୍ୟକ୍ରମ ରହିଛି । ପୂଜାର୍ଚ୍ଚନା ପରେ ସେ ତତ୍କାଳ ଦିଲ୍ଲୀ ଫେରିଯିବେ ବୋଲି ଜଣା ପଡିଛି । ତେବେ ଏନେଇ ବିମାନବନ୍ଦର ଠାରୁ ମନ୍ଦିର ଯିବା ରାସ୍ତା ଏବଂ ମନ୍ଦିର ଭିତରେ ମୋଦିଙ୍କ ପାଇଁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି ।
ତେବେ ଏହି ସମୟରେ ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡୀ ଏବଂ ରାଜ୍ୟପାଳ ଇଏସଏଲ ନରସିଂହମନ ପ୍ରଧାନମନ୍ତ୍ରୀଙ୍କ ସହ ମନ୍ଦିର ଯାଇପାରନ୍ତି । ଦ୍ବିତୀୟ ଥର ପ୍ରଧାନମନ୍ତ୍ରୀ ହେବାପରେ ଏହା ମୋଦିଙ୍କ ପ୍ରଥମ ତିରୁପତି ଗସ୍ତ ହେବ ।
