ନୂଆଦିଲ୍ଲୀ: ଲଦାଖ ସ୍ଥିତି ପରଖିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଅଚାନକ ଲେହ ଗସ୍ତ କରିଛନ୍ତି । ଚୀନ ସୀମାରେ ଲାଗି ରହିଥିବା ଉତ୍ତେଜନାର ସମୀକ୍ଷା କରିବେ । ସେପଟେ ପିଏମଙ୍କ ଏହି ଗସ୍ତକୁ ନେଇ ପ୍ରତିକ୍ରିୟା ଆସିବାରେ ଲାଗିଛି । ପ୍ରତି ରକ୍ଷାମନ୍ତ୍ରୀ ରାଜନାଥ ସିଂ ମଧ୍ୟ ଟ୍ବିଟ କରି ମୋଦିଙ୍କ ଗସ୍ତକୁ ସ୍ବାଗତ କରିଛନ୍ତି ।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ଟ୍ବିଟ କରି କହିଛନ୍ତି ଭାରତୀୟ ସେନା ହାତରେ ଦେଶର ସୀମା ସୁରକ୍ଷିତ ରହିଛି । ପ୍ରଧାନମନ୍ତ୍ରୀ ମୋଦି ଆଜି ଲଦାଖ ଗସ୍ତ କରି ଯବାନଙ୍କ ମନୋବଳ ବଢାଇବା ସହ ସେମାନଙ୍କ ଭିତରେ ଉତ୍ସାହ ଭରି ଦେଇଛନ୍ତି । ପିଏମଙ୍କ ଏଭଳି ପଦକ୍ଷେପକୁ ପ୍ରଶଂସା କରିବା ସହ ଧନ୍ୟବାଦ ଜଣାଇଛନ୍ତି ରାଜନାଥ ସିଂ।
ସୂଚନାଯୋଗ୍ୟ, ପ୍ରଥମେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଲେହ ଗସ୍ତରେ ଯିବାର ଯୋଜନା ଥିଲା । କିନ୍ତୁ ଶେଷ ମୁହୂର୍ତ୍ତରେ ତାଙ୍କର ଯାତ୍ରା ବାତିଲ କରାଯାଇଥିଲା । ଏହା ପରେ ନିଷ୍ପତ୍ତି ନିଆଯାଇଥିଲା ଯେ କେବଳ ସିଡିଏଫ ବିପିନ ରାୱତ ଲେହ ଯିବେ।
ଶୁକ୍ରବାର ସକାଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲେହରେ ପହଞ୍ଚି ସମସ୍ତଙ୍କୁ ଆଶ୍ଚର୍ଯ୍ୟ କରାଇ ଦେଇଛନ୍ତି । ପ୍ରଧାନମନ୍ତ୍ରୀ ମୋଦି ଏଠାରେ ସାମରିକ ଅଧିକାରୀଙ୍କ ସହ ଏକ ବୈଠକ କରିଥିଲେ। ଏହି ସମୟରେ ସେନା ଏବଂ ବାୟୁସେନାର ଅଧିକାରୀମାନେ ମଧ୍ୟ ଏଥିରେ ସାମିଲ ହୋଇଥିଲେ।
