ନୂଆଦିଲ୍ଲୀ: କୋରୋନାକୁ ନେଇ ସାରା ବିଶ୍ବ ଆତଙ୍କିତ । ଦେଶ ବିଦେଶରେ କୋରୋନାକୁ ମହାମାରୀ ଘୋଷଣା କରାଯାଇସାରିଛି । ଭାରତରେ ଏହାକୁ ରାଷ୍ଟ୍ରୀୟ ବିପର୍ଯ୍ୟୟ ଘୋଷଣା ହୋଇଛି । କୋରୋନା ସହ ଲଢେଇ ପାଇଁ ନିଜେ ପ୍ରଧାନମନ୍ତ୍ରୀ ମୋଦି ଦେଶ ତଥା ବିଶ୍ବସ୍ତରରେ ଅଭିଯାନ ଆରମ୍ଭ କରିଛନ୍ତି । କୋରୋନାକୁ ନେଇ ମୋଦି ରବିବାର ରାଷ୍ଟ୍ରସମୂହଙ୍କ ସହ ଭିଡିଓ କନଫରେନ୍ସିଂ ଜରିଆରେ ଆଲୋଚନା କରିଛନ୍ତି । ଏହି ଭିଡିଓ କନଫରେନ୍ସିଂ ସମ୍ମିଳନୀରେ ଶ୍ରୀଲଙ୍କା ରାଷ୍ଟ୍ରପତି ଗୋତବାୟା ରାଜପକ୍ଷ, ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସୀନା, ଆଫଗାନିସ୍ତାନ ରାଷ୍ଟ୍ରପତି ଅଶରଫ ଗନୀ, ମାଲଦୀପ ରାଷ୍ଟ୍ରପତି ଇବ୍ରାହିମ ସୋଲୀ, ଭୂଟାନର ପ୍ରଧାନମନ୍ତ୍ରୀ ଓ ନେପାଳର ପ୍ରଧାନମନ୍ତ୍ରୀ ମଧ୍ୟ ସାମିଲ ରହିଛନ୍ତି ।
କୋରୋନାଠୁ ଭୟ କରିବାର ନୁହେଁ ବରଂ ଏହି ସମୟରେ ଏକଜୁଟ ହୋଇ ଲଢିବାର ସମୟ ବୋଲି ପ୍ରଧାନମନ୍ତ୍ରୀ ମୋଦି କହିଛନ୍ତି । ମୋଦି କହିଛନ୍ତି ଯେ ସାର୍କ ଦେଶଗୁଡିକୁ ସତର୍କତା ଅବଲମ୍ବନ କରିବାକୁ ପଡିବ । ସାର୍କ ଦେଶଗୁଡିକରେ 150ରୁ କମ ମାମଲା ଏଯାଏଁ ସାମ୍ନାକୁ ଆସିଛି । କୋରୋନାକୁ ନେଇ ଭାରତରେ ସଚେତନତା ଅଭିଯାନ ଚଳାଯାଉଛି । କୋରୋନାକୁ ବିଶ୍ବ ସ୍ବାସ୍ଥ୍ୟ ସଙ୍ଗଠନ ମହାମାରୀ ଘୋଷଣା କରିଛି । ତେଣୁ କୋରୋନାଠୁ ସାବଧାନ ତଥା ସତର୍କତା ରହିବାର ଆବଶ୍ୟକତା ରହିଛି । ଏହାସହ ମୋଦି କହିଛନ୍ତି, ଭାରତର ମନ୍ତ୍ର ରହିଛି ଯେ ପ୍ରସ୍ତୁତ ରୁହନ୍ତୁ, କିନ୍ତୁ ଭୟ କରନ୍ତୁ ନାହିଁ । ଏହି ମନ୍ତ୍ର ଦ୍ବାରା କୋରୋନା ଭାଇରସ ସହ ମୁକାବିଲା କରାଯାଇ ପାରିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
