ଭୁବନେଶ୍ବର: ଆଜିଠୁ କୋଣାର୍କରେ ଆରମ୍ଭ ହେବାକୁ ଯାଉଛି ଦୁଇ ଦିନିଆ ଖଣି ମନ୍ତ୍ରୀ ସମ୍ମିଳନୀ । ଏଥିରେ ସମସ୍ତ ରାଜ୍ୟର ଖଣି ମନ୍ତ୍ରୀ ମାନେ ଯୋଗ ଦେବେ । ଆଜିଠୁ ଆରମ୍ଭ ହେବାକୁ ଥିବା ଏହି ସମ୍ମିଳନୀ ଆସନ୍ତାକାଲି ପର୍ଯ୍ୟନ୍ତ ଚାଲିବ । କେନ୍ଦ୍ର ଖଣି ମନ୍ତ୍ରୀ ଜି.କିଶନ ରେଡ୍ଡୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେବାକୁ ଥିବା ଏହି ସମ୍ମିଳନୀରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମଧ୍ୟ ଯୋଗ ଦେବେ ।
କୋଣାର୍କରେ 2 ଦିନିଆ ଖଣି ସମ୍ମିଳନୀ:
ତୃତୀୟ ଜାତୀୟ ଖଣି ମନ୍ତ୍ରୀ ସମ୍ମିଳନୀ କୋଣାର୍କରେ ଅନୁଷ୍ଠିତ ହେବାକୁ ଯାଉଛି । ଜାନୁଆରୀ 20 ଓ ଜାନୁଆରୀ 21 ଦୁଇ ଦିନ ପର୍ଯ୍ୟନ୍ତ ଚାଲିବ । ଏଥିରେ ଏକାଧିକ ରାଜ୍ୟର ଖଣି ମନ୍ତ୍ରୀ, ଝାଡଖଣ୍ଡ ମୁଖ୍ୟମନ୍ତ୍ରୀ, କେନ୍ଦ୍ର ଓ ଓଡ଼ିଶା ସରକାରଙ୍କ ବରିଷ୍ଠ ଅଧିକାରୀ ମାନେ ଯୋଗ ଦେବେ ।
କୋଣାର୍କରେ ହେବାକୁ ଥିବା ତୃତୀୟ ଜାତୀୟ ଖଣି ମନ୍ତ୍ରୀଙ୍କ ସମ୍ମିଳନୀରେ ଯୋଗଦେବା ନିମନ୍ତେ ଓଡ଼ିଶା ଗସ୍ତରେ ଆସିଥିବା ମାନ୍ୟବର କେନ୍ଦ୍ର କୋଇଲା ଓ ଖଣି ମନ୍ତ୍ରୀ ଶ୍ରୀ @kishanreddybjp ଙ୍କ ସହ ରାଜ୍ଯରେ ଖଣିଜ ଶିଳ୍ପର ବିକାଶ ସହ ଏହାର ପରିଚାଳନା ଏବଂ କାର୍ଯ୍ୟକ୍ଷମତା ସମ୍ପର୍କରେ ବିସ୍ତୃତ ଅଲୋଚନା କରିଛି। pic.twitter.com/fZZfHp2Lwy
— Mohan Charan Majhi (@MohanMOdisha) January 19, 2025
ନିଲାମ ହେବାକୁ ଥିବା ଖଣି ସମ୍ପର୍କରେ ନିଷ୍ପତ୍ତି ହୋଇପାରେ:
ଏହି ସମ୍ମିଳନୀରେ ଆଗାମୀ ଦିନରେ ନିଲାମ ହେବାକୁ ଥିବା ଖଣି ସମ୍ପର୍କରେ ନିଷ୍ପତ୍ତି ହୋଇପାରେ । ଖଣି କ୍ଷେତ୍ରର ନିରାପତ୍ତା, ପରିବେଶ ସମସ୍ୟା ଓ ପରିବହନ ଆହ୍ବାନ ଭଳି ବିଭିନ୍ନ ପ୍ରସଙ୍ଗରେ ଆଲୋଚନା ହୋଇପାରେ । ଖଣିଜ ସମ୍ପଦର ସମ୍ଭାବନାକୁ ଉନ୍ମୋଚନ ଓ ବିକଶିତ ଭାରତ 2047 ପରିକଳ୍ପନାରେ ଦେଶର ବିକାଶରେ ଯୋଗଦାନ କରିବା ଏହାର ଉଦ୍ଦେଶ୍ୟ ।
ଓଡ଼ିଶାରେ କେନ୍ଦ୍ର ଖଣି ମନ୍ତ୍ରୀ:
ତୃତୀୟ ଜାତୀୟ ଖଣି ମନ୍ତ୍ରୀ ସମ୍ମିଳନୀରେ ଯୋଗ ଦେବାକୁ ଓଡ଼ିଶା ଗସ୍ତରେ ଆସିଛନ୍ତି କେନ୍ଦ୍ର କୋଇଲା ଓ ଖଣି ମନ୍ତ୍ରୀ ଜି.କିଶନ ରେଡ୍ଡୀ । ଗତକାଲି(ରବିବାର) ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ତାଙ୍କୁ ସାକ୍ଷାତ କରି ରାଜ୍ୟର ଖଣିଜ ଶିଳ୍ପର ବିକାଶ ସହ ଏହାର ପରିଚାଳନା ଓ କାର୍ଯ୍ୟକ୍ଷମତା ଉପରେ ଆଲୋଚନା କରିଥିଲେ ।
ଓଡ଼ିଶାରେ ଲିଥିୟମ ଭଣ୍ଡାର:
ନୟାଗଡ ଜିଲ୍ଲାରେ ରହିଛି ଲିଥିୟମ ଭଣ୍ଡାର । ଏନେଇ ସଙ୍କେତ ପାଇଛି ଜିଓଲୋଜିକାଲ ସର୍ଭେ ଅଫ୍ ଇଣ୍ଡିଆ (GSI) । ଲିଥିୟମ ଭଣ୍ଡାର ସମ୍ପର୍କରେ ଅଧିକ ତଥ୍ୟ ସଂଗ୍ରହ ପାଇଁ ପାଇଲଟ ପ୍ରକଳ୍ପ ହାତକୁ ନିଆଯାଇଛି । କୃତ୍ରିମ ବୁଦ୍ଧିମତା(AI) ବ୍ୟବହାର କରାଯାଇ ତଥ୍ୟ ନିଆଯାଉଛି । କେବଳ ନୟାଗଡ ନୁହେଁ ଅନ୍ୟ କିଛି ଜିଲ୍ଲାରେ ମଧ୍ୟ ଲିଥିୟମ ଥିବା ସଙ୍କେତ ମିଳିଛି ।
