ପଞ୍ଜାବ: ରୋହିତ ମେହେରା ଓରଫ 'ଗ୍ରୀନ ମ୍ୟାନ' । ସାରା ଦେଶରେ 75ରୁ ଅଧିକ ଗ୍ରୀନ ବେଲ୍ଟର ବିକାଶ କରିଛନ୍ତି ରୋହିତ । ଆଉ ସେ ବିକଶିତ କରିଥିବା ପ୍ରତି ଗ୍ରୀନ ବେଲ୍ଟରେ ରହିଛି 600ରୁ 700 ଗଛ । ଏହିଭଳି ଭାବେ ସେ ଦେଶର କୋଣ ଅନୁକୋଣରେ ପାଖାପାଖି 8 ଲକ୍ଷ ଚାରା ରୋପଣ କରିସାରିଛନ୍ତି ।
ରୋହିତ ମେହେରା ବର୍ତ୍ତମାନ ଲୁଧିଆନାରେ ଆୟକର ବିଭାଗରେ ଯୁଗ୍ମ ନିର୍ଦ୍ଦେଶକ ଭାବରେ କାର୍ଯ୍ୟ କରୁଛନ୍ତି । ହେଲେ ସେ ନିଜ ପେଶା ଆଗରେ ପରିବେଶ ପ୍ରତି ଥିବା ତାଙ୍କ ପ୍ରେମକୁ କେବେ ବି ବାଧକ ସାଜିବାକୁ ଦେଇନାହାନ୍ତି । ଗତ 4 ବର୍ଷ ଧରି ରୋହିତ ମେହେରା ନିଜ ବଳରେ ବୃକ୍ଷରୋପଣ ଅଭିଯାନ ଚଳାଉଛନ୍ତି । ପଞ୍ଜାବର ପ୍ରତି ଜିଲ୍ଲାରେ ସେ ଗ୍ରୀନ ବେଲ୍ଟର ବିକାଶ କରିବା ବ୍ୟତୀତ ସୁରଟ, ବଡୋଦା, ମୁମ୍ବାଇ ଏବଂ ଦିଲ୍ଲୀ ସମେତ ଭାରତର ଅନ୍ୟ ସହରରେ ଏକ ଛୋଟ ଛୋଟ ଜଙ୍ଗଲ ସୃଷ୍ଟି କରି ସବୁଜ ପରିବେଶର ଛାପ ଛାଡିଛନ୍ତି ।
ପରିବେଶ ପ୍ରେମୀ ସହ ରୋହିତ ଜଣେ ଉଚ୍ଚପଦସ୍ତ ସରକାରୀ ଅଧିକାରୀ । ତଥାପି ନିଜ ବ୍ୟସ୍ତବହୁଳ କାର୍ଯ୍ୟରୁ ସେ ଟିକେ ସମୟ ବାହାର କରି ପରିବେଶର ସୌନ୍ଦର୍ଯ୍ୟକୁ ସୁରକ୍ଷିତ କରିଥାନ୍ତି । ଆଉ ପରିବେଶକୁ ସ୍ବଚ୍ଛ ଏବଂ ସବୁଜ ରଖିବା ପାଇଁ ଦିନରାତି କାମ କରିଥାନ୍ତି ।
ରୋହିତ ଦେଶକୁ ସବୁଜ ରଖିବା ପାଇଁ 1000 ଗ୍ରୀନ ବେଲ୍ଟ କିମ୍ବା ଛୋଟ ଜଙ୍ଗଲ ବିକାଶ କରିବାକୁ ସଂକଳ୍ପବଦ୍ଧ । ଆଉ ପ୍ରକୃତି ଓ ପରିବେଶ ପ୍ରତି ତାଙ୍କ ଏହି ପ୍ରେମ ପାଇଁ ସେ ସମଗ୍ର ପଞ୍ଜାବରେ ପ୍ରସିଦ୍ଧ । ଏକ ଉଚ୍ଚପଦସ୍ଥ ସରକାରୀ ହେବା ସତ୍ତ୍ବେ ରୋହିତଙ୍କ ପ୍ରକୃତି ଓ ପରିବେଶ ପ୍ରତି ଏଭଳି ଭଲ ପାଇବା ବାସ୍ତବରେ ପ୍ରଶଂସନୀୟ ଓ ଅନୁକରଣନୀୟ ।
ବ୍ୟୁରୋ ରିପୋର୍ଟ, ଇଟିଭି ଭାରତ
