ଦିଶପୁର: ଦୁନିଆରେ ଅନେକ ପ୍ରଜାତିର ସାପ ରହିଛନ୍ତି । ସେଥିମଧ୍ୟରୁ ସବୁଠାରୁ ଅତ୍ୟଧିକ ବିଷଧର ସାପ ହେଉଛି କିଙ୍ଗ କୋବ୍ରା । ତେବେ ଆସାମର ନୌଗାଁରେ ଥିବା ଜିଆଜୁରୀ ଟି-ଷ୍ଟେଟରେ 14ଫୁଟର ଏକ କିଙ୍ଗ କୋବ୍ରା ଉଦ୍ଧାର କରାଯାଇଛି । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ଏକ ଜାତୀୟ ଗଣମାଧ୍ୟମର ସୂଚନାମୁତାବକ, ଜୁଲାଇ 5 ତାରିଖରେ ଏକ ଚା ବଗିଚାରେ କାମ କରୁଥିବା ସମୟରେ କିଛି ଲୋକ ଏହି ସାପକୁ ଦେଖିଥିଲେ । ଏହାପରେ ସେ ବନ ବିଭାଗକୁ ଖବର ଦେଇଥିଲେ । ଖବରପାଇ ଘଟଣାସ୍ଥଳରେ ବନ ବିଭାଗ ପହଞ୍ଚି କିଙ୍ଗ କୋବ୍ରାକୁ ଉଦ୍ଧାର କରି ସୁବଙ୍ଗ ରିଜର୍ଭ ଫରେଷ୍ଟରେ ଛାଡିଦେଇଥିଲେ ।
ତେବେ ଏହି ସାପକୁ ଉଦ୍ଧାର କରିବା ଏତେ ସହଜ ନଥିଲା । ଏହାକୁ ଧରିବା ସମୟରେ ଅନେକ ଥର ଏହା ବୁଲିକି ଚୋଟ ମାରିବାକୁ ମଧ୍ୟ ଚେଷ୍ଟା କରିଥିଲା । ତେବେ ଏତେ ବଡ ସାପକୁ ଦେଖି ଉକ୍ତ ଅଞ୍ଚଳରେ ଚହଳ ସୃଷ୍ଟି ହୋଇଥିଲା ।
