ବେଙ୍ଗାଲୁରୁ: ଭାରତ-ଚୀନ ସୀମା ବିବାଦ ମଧ୍ୟରେ ବୁଧବାର ଭାରତ ପକ୍ଷରୁ ହୋଇଛି ତୃତୀୟ ଡିଜିଟାଲ ଷ୍ଟ୍ରାଇକ । ପୂର୍ବରୁ ହୋଇଥିବା ଦୁଇ ଡିଜିଟାଲ ଷ୍ଟ୍ରାଇକରେ 106ଟି ଚୀନ ଆପ୍କୁ ବ୍ୟାନ କରାଯାଇଥିବା ବେଳେ ବୁଧବାର ପୁଣି ବ୍ୟାନ ହୋଇଛି 118ଟି ଆପ୍ । ଯେଉଁଥିରେ ସାମିଲ ରହିଛି ଲୋକପ୍ରିୟ ଗେମିଂ ଆପ୍ ପବଜି । ତେବେ ଏହା ପଛରେ ମୁଖ୍ୟ ଉଦ୍ଦେଶ୍ୟ ହେଉଛି ପୂର୍ବରୁ ବ୍ୟାନ ହୋଇଥିବା ଟିକ୍ଟକ୍ ପ୍ରତି ସମସ୍ତ ଆକ୍ସେସକୁ ବ୍ଲକ କରିବା । ଯାହାର ଯୁବପୀଢିଙ୍କ ଉପରେ ପଡିଛି ବିଶେଷ ପ୍ରଭାବ ।
ପବଜି ଖେଳର ପ୍ରାୟ 600 ମିଲିୟନ ଡାଉନଲୋଡ ରହିଥିବା ବେଳେ ଏହାର ପ୍ରାୟ 50 ମିଲିୟନ ସକ୍ରିୟ ପ୍ଲେୟାର ରହିଥିଲେ । ମୁଖ୍ୟତଃ ଯୁବପୀଢି ଏହାର ମାତ୍ରାଧିକ ବ୍ୟବହାର କରୁଥିଲେ । ହେଲେ ସରକାରଙ୍କ ଦ୍ବାର ଏହା ହଠାତ୍ ବ୍ୟାନ ହେବା ପରେ ଏବେ ଯୁବପୀଢିଙ୍କ ଉପରେ ପଡିଛି ଏହାର ବିଶେଷ ପ୍ରଭାବ । ଯେଉଁଥରୁ ସେମାନଙ୍କୁ ମୁକ୍ତି ଦେବା ପାଇଁ କେବଳ ଅଭିଭାବକମାନେ ହିଁ ସାହାଯ୍ୟ କରିପାରିବେ ବୋଲି ମନସ୍ତତ୍ତ୍ବବିତମାନେ ମତ ଦେଇଛନ୍ତି ।
ପବଜି ସମ୍ପୂର୍ଣ୍ଣ ଚାଇନିଜ ଆପ୍ ହୋଇ ନଥିବା ବେଳେ ଏଥିରେ ଦକ୍ଷିଣ କୋରିଆନ କମ୍ପାନୀ ବ୍ଲୁହୋଲର ମଧ୍ୟ ସମ୍ପୃକ୍ତି ରହିଥିଲା । ତେବେ ଏହା ବ୍ୟାନ ହେବା ପରେ ପିଲାମାନେ ଯେପରି ମାନସିକ ଅବସାଦ ଦେଇ ଗତି ନକରିବେ ସେଥିପାଇଁ ଅଭିଭାବକମାନଙ୍କୁ ବିଶେଷ ଧ୍ୟାନ ଦେବାକୁ ହେବ । ପିଲାଙ୍କୁ ବିଭିନ୍ନ ପ୍ରକାରେ ଅନ୍ୟ ତଥା ସାମାଜିକ କାର୍ଯ୍ୟରେ ବ୍ୟସ୍ତ ରଖିବାକୁ ହେବ । ଏଥିସହ ସେମାନଙ୍କୁ ମାନସିକସ୍ତରରେ ସାହାଯ୍ୟ କରିବା ପାଇଁ ମଧ୍ୟ ମନସ୍ତତ୍ତ୍ବବିତମାନେ ମତ ଦେଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
