ଇସଲାମାବାଦ: ପାକିସ୍ତାନ କୋର୍ଟରେ ବନ୍ଦୀ ଥିବା ଭାରତୀୟ ନାଗରିକ କୁଳଭୂଷଣ ଯାଦବଙ୍କ ପକ୍ଷ ରଖିବା ପାଇଁ ଆଇନଜୀବୀ ନିଯୁକ୍ତ କରିବା ମାମଲାରେ ଅକ୍ଟୋବର 6ରେ ଶୁଣାଣି କରିବେ ଇସଲାମାବାଦ ହାଇକୋର୍ଟ । ଏହାପୂର୍ବରୁ ପାକିସ୍ତାନ ଆଇନ ମନ୍ତ୍ରଣାଳୟ ପକ୍ଷରୁ କରାଯାଇଥିବା ଅପିଲ ଉପରେ ଶୁଣାଣି ହୋଇଥିଲା ।
ପୂର୍ବ ଶୁଣାଣିରେ କୋର୍ଟ ପୁଣି ଥରେ ପାକିସ୍ତାନ ସରକାରଙ୍କୁ ଭାରତର ହାଇକମିଶନଙ୍କୁ ଆଇନଜୀବୀ ନିଯୁକ୍ତ କରିବା ପାଇଁ ପ୍ରସ୍ତାବ ଦେବାକୁ କହିଥିଲେ। ତେବେ କୌଣସି ପାକିସ୍ତାନର ଆଇନଜୀବୀଙ୍କୁ କୁଳଭୂଷଣଙ୍କ ପକ୍ଷ ରଖିବାକୁ କୋର୍ଟକୁ ପଠାଇ ନାହିଁ ଭାରତ ।
ପାକିସ୍ତାନ ବୈଦେଶିକ ମନ୍ତ୍ରଣାଳୟର ମୁଖପାତ୍ର ଜାହିଦ ହାଫିଜ ଚୌଧୁରୀ କହିଥିଲେ ଯେ ଭାରତୀୟ ଆଇନଜୀବୀଙ୍କୁ ଯାଦବଙ୍କ ପ୍ରତିନିଧିତ୍ବ କରିବାକୁ ଅନୁମତି ଦେବା ପାଇଁ ଭାରତୀୟ ପକ୍ଷ ଏକ ଅସଙ୍ଗତ ଦାବି କରୁଛନ୍ତି। ଆମେ ତାଙ୍କୁ ବାରମ୍ବାର କହିଛୁ ଯେ କେବଳ ସେହି ଆଇନଜୀବୀମାନେ ଯାଦବଙ୍କୁ କୋର୍ଟରେ ପ୍ରତିନିଧିତ୍ବ କରିପାରିବେ, ଯାହାର ପାକିସ୍ତାନରେ ଅଭ୍ୟାସ କରିବାର ଲାଇସେନ୍ସ ରହିଛି ବୋଲି ଚୌଧୁରୀ ନିଜ ପ୍ରତିକ୍ରିୟାରେ କହିଥିଲେ ।
ଅନ୍ୟପକ୍ଷେ କୁଳଭୂଷଣଙ୍କ ମାମଲାରେ ଭାରତୀୟ ବୈଦେଶିକ ମନ୍ତ୍ରଣାଳୟ କହିଥିଲା ଯେ ଆମେ କୂଟନୀତି ମାଧ୍ୟମରେ ପାକିସ୍ତାନ ସମ୍ପର୍କରେ ରହିଛୁ । କୁଳଭୂଷଣଙ୍କୁ ସୁରକ୍ଷା ଦେବାରେ ଭାରତ ସରକାର ଯଥାସମ୍ଭବ ପ୍ରୟାସ ଜାରି ରଖିଥିବା ବୈଦେଶିକ ମନ୍ତ୍ରଣାଳୟ ପକ୍ଷରୁ କୁହାଯାଇଥିଲା ।
