ଶ୍ରୀନଗର: ବଢିବାରେ ଲାଗିଛି ପାକିସ୍ତାନର ବଦମାସୀ । ବାରମ୍ବାର ଅସ୍ତ୍ରବିରତି ଉଲଙ୍ଘନ କରି ସୀମାରେ ଉତ୍ତେଜନାତ୍ମକ ପରିସ୍ଥିତି ସୃଷ୍ଟି କରିବାକୁ ପଛାଉ ନାହିଁ ପାକିସ୍ତାନ । ଏମିତିରେ ଜମ୍ମୁ କଶ୍ମୀରରେ ସୋମବାର ଅସ୍ତ୍ରବିରତି ଉଲଙ୍ଘନର କଡା ଜବାବ ଦେଇଛନ୍ତି ଭାରତୀୟ ସେନା । ଭାରତୀୟ ସେନାର ଏହି ପାଲଟା ଆକ୍ରମଣରେ ସୀମାରେ ଜଣେ ପାକିସ୍ତାନୀ ଜବାନ ନିହତ ହୋଇଥିବା ବେଳେ ଅନ୍ୟ 8 ଜଣ ଜବାନ ଆହତ ହୋଇଥିବା ଜଣା ପଡିଛି ।
ସୂଚନା ଅନୁଯାୟୀ ସୋମବାର ହାଜିପୁର, ପୁଞ୍ଚ, ଛମ୍ବ ଓ ରାଖ ଚିକ୍ରି ସେକ୍ଟରରେ ପାକିସ୍ତାନ ଅସ୍ତ୍ରବିରତି ଉଲଙ୍ଘନ କରିଥିଲା । ଏହି ଘଟଣାକୁ ନେଇ ଭାରତୀୟ ସେନାର ସୂଚନା ମୁତାବକ ଜମ୍ମୁ ଓ କଶ୍ମୀରରେ ପାକିସ୍ତାନ ପକ୍ଷରୁ ବାରମ୍ବାର ଅସ୍ତ୍ରବିରତି ଉଲଙ୍ଘନ ହେଉଥିବା ଦେଖାଯାଉଛି । ସୋମବାର ମଧ୍ୟ ବିଭିନ୍ନ ସ୍ଥାନରେ ଏହି ଘଟଣା ଦୋହରିଥିବା ଦେଖାଯାଇଥିଲା । ଯାହାର ଭାରତୀୟ ସେନା ଦୃଢ ଜବାବ ଦେଇଛନ୍ତି । ଏଥିରେ ଜଣେ ପାକିସ୍ତାନୀ ଜବାନ ନିହତ ହୋଇଥିବା ବେଳେ 8 ଜଣ ଜବାନ ଆହତ ହୋଇଛନ୍ତି ।
ସେପଟେ ଜୁଲାଇ 24ରେ ଜମ୍ମୁ ଓ କଶ୍ମୀର ପୋଲିସ ମହାନିର୍ଦ୍ଦେଶକ ଦିଲବାଗ ସିଂ କହିଥିଲେ କି ଗତବର୍ଷ ତୁଳନାରେ ଚଳିତବର୍ଷ ପାକିସ୍ତାନ ଦ୍ବାରା ଅସ୍ତ୍ରବିରତି ଉଲଙ୍ଘନର ମାତ୍ରା 50 ରୁ 60 ପ୍ରତିଶତ ବୃଦ୍ଧି ପାଇଛି । ତେବେ 2018 ତୁଳନାରେ 2019ରେ ଏହି ମାତ୍ରା 70 ପ୍ରତିଶତ ବଢିଥିଲା । ଏସବୁକୁ ନଜରରେ ରଖି ପାକିସ୍ତାନ ଆଗକୁ ମଧ୍ୟ ନିଜର କାର୍ଯ୍ୟକଳାପ ଜାରି ରଖିବ ବୋଲି ସେ ସୂଚନା ଦେଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
