ଇସଲାମାବାଦ: କାଶ୍ମୀର ଚା’ର ପ୍ରଶଂସା । ତାହା ପୁଣି ପାକିସ୍ତାନୀଙ୍କ ମୁହଁରେ । ଆଜ୍ଞା ହଁ, ଏପରି ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଯେଉଁଥିରେ ପାକିସ୍ତାନୀ ବକ୍ସର ଅମୀର ଖାନ ଭାରତର ୱିଙ୍ଗ କମାଣ୍ଡର ଅଭିନନ୍ଦନଙ୍କ ନକଲ କରିଛନ୍ତି ।
ପାକିସ୍ତାନୀ-ବ୍ରିଟିଶ ବକ୍ସର ଅମୀର ଖାନଙ୍କ ଏହି ଭିଡିଓ ଏବେ ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଛି । ଏଥିରେ ଭାରତର ବୀର ପାଇଲଟ ୱିଙ୍ଗ କମାଣ୍ଡର ଅଭିନନ୍ଦନଙ୍କ ନକଲ କରୁଛନ୍ତି ଅମୀର । ଭିଡିଓରେ ଅମୀର ଏକ ଚା’ କପ ଧରି ପିଉଥିବାବେଳେ ଚତ୍ମକାର ଚା’, କାଶ୍ମୀର ଚା’ କହୁଥିବାର ଦେଖାଯାଉଛି । ଏହି ଭିଡିଓକୁ ନିଜ ସୋସିଆଲ ମିଡିଆ ଆକାଉଣ୍ଟରେ ସେୟାର କରିଛନ୍ତି ପାକିସ୍ତାନ ମେଜର ଜେନେରାଲ ଅସିଫ ଗଫୁର ।
ତେବେ ଭିଡିଓକୁ ନେଇ ବିବାଦ ଦେଖାଦେବାରୁ ସେୟାରର କିଛି ସମୟ ପରେ ଏହାକୁ ହଟାଇ ଦେଇଥିଲେ ଗଫୁର । ଏବେ ଅମୀର ଖାନ ପାକିସ୍ତାନ ଗସ୍ତରେ ଅଛନ୍ତି । ଏହି ଅବସରରେ ସେ କାଶ୍ମୀର ସପକ୍ଷରେ ନିଜ ମତ ରଖିଛନ୍ତି । କାଶ୍ମୀର ଭାଇଙ୍କ ସହ ଏକଜୁଟ ନାମକ କାର୍ଯ୍ୟକ୍ରମ ଲାଗି ସେ ପାକିସ୍ତାନ ଆସିଥିବା ଜଣାପଡିଛି । ଅମୀର ଲଣ୍ଡନରେ ବସବାସ କରନ୍ତି ଏବଂ ସେ ଜଣେ ପେସାଦାର ବକ୍ସର ଭାବେ ପ୍ରସିଦ୍ଧ ।
ସୂଚନାନୁସାରେ, ଫେବୃୟାରୀ ୨୭ରେ ପାକିସ୍ତାନର ଏଫ-୧୬ ବିମାନ ସହ ଯୁଦ୍ଧ କରି ପାକ ସୀମାରେ ଖସି ପଡିଥିଲେ ୱିଙ୍ଗ କମାଣ୍ଡର ଅଭିନନ୍ଦନ । ତାଙ୍କୁ ପାକ ସେନା କବଜାକୁ ନେବା ପରେ ୬୦ ଘଣ୍ଟା ରଖିଥିଲେ । ଏହାପରେ ଅଭିନନ୍ଦନଙ୍କୁ ଭାରତ ସୀମାରେ ଛଡାଯାଇଥିଲା । ତେବେ ଏହି ସମୟରେ ଅଭିନନ୍ଦନଙ୍କ ଏକ ଭିଡିଓ ଭାଇରାଲ ହୋଇଥିଲା । ଯେଉଁଥିରେ ସେ ଚା’ ପିଉଥିବାର ନଜର ଆସିବା ସହ ଚା’ର ପ୍ରଶଂସା ମଧ୍ୟ କରିଥିଲେ । ଭିଡିଓରେ ଅଭିନନ୍ଦନ କହୁଥିଲେ ପାକିସ୍ତାନ ଚା’ ଚତ୍ମକାର ।
