ନୂଆଦିଲ୍ଲୀ: ଜେଲରୁ ବାହାରକୁ ଆସିବା ମାତ୍ରେ ଆକ୍ସନ ମୁଡରେ ପୂର୍ବତନ ଅର୍ଥମନ୍ତ୍ରୀ ପି. ଚିଦାମ୍ବରମ । ସଂସଦରେ ପିଆଜ ଦରବୃଦ୍ଧିକୁ ନେଇ ଶାସକ ଦଳକୁ ଘେରିଛନ୍ତି ସେ । ଗତକାଲି ଜେଲରୁ ମୁକୁଳିବା ପରେ ଗୁରୁବାର ସଂସଦରେ ପହଞ୍ଚିଛନ୍ତି ଚିଦାମ୍ବରମ । ପିଆଜ ଦରବୃଦ୍ଧିକୁ ନେଇ କଂଗ୍ରେସ ନେତାଙ୍କ ସହ ସଂସଦ ପରିସରରେ ବିକ୍ଷୋଭ ପ୍ରଦର୍ଶନ କରିଛନ୍ତି ସେ ।
ଏହି ସମୟରେ ଗଣମାଧ୍ୟମରେ ପ୍ରତିକ୍ରିୟା ଦେଇ ସେ କହିଛନ୍ତି, ଯେଉଁ ସରକାର ଲୋକଙ୍କୁ ପିଆଜ ଏବଂ ରସୁଣ କମ ଖାଇବାକୁ ପରାମର୍ଶ ଦେଉଛନ୍ତି ସେ ସରକାରଙ୍କୁ ଶାସନ କ୍ଷମତାରେ ରହିବାର କୌଣସି ଅଧିକାର ନାହିଁ । ଏହା ସହିତ ଅର୍ଥ ବ୍ୟବସ୍ଥା ମାମଲାରେ ମୋଦି ସରକାର ସମ୍ପୂର୍ଣ୍ଣ ଫେଲ ମାରିଥିବା ଚିଦାମ୍ବରମ କହିଛନ୍ତି ।
ସୂଚନାଯୋଗ୍ୟ ଯେ, ବୁଧବାର ଲୋକସଭାରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ପିଆଜ ଦରବୃଦ୍ଧିକୁ ନେଇ ଅଦ୍ଭୁତ ବୟାନ ଦେଇଥିଲେ । କଂଗ୍ରେସ ନେତା ପିଆଜ ଦରବୃଦ୍ଧି ପ୍ରସଙ୍ଗ ଉଠାଇବାରୁ ନିର୍ମଳା ଜବାବ ଦେଇ କହିଥିଲେ, ମୁଁ ଅତ୍ୟଧିକ ପିଆଜ ରସୁଣ ଖାଏନାହିଁ । ମୋ ପରିବାରରେ ପିଆଜର କୌଣସି ଗୁରୁତ୍ବ ନାହିଁ ବୋଲି ସେ କହିଥିଲେ । ଯାହାକୁ ନେଇ ଗୃହରେ ହଙ୍ଗାମା କରିଥିଲେ ବିରୋଧୀ ।
