ପାଟନା: କୋରୋନା ମହାମାରୀ ମଧ୍ୟରେ ଦେଶରେ ରାଜ୍ୟ ସରକାର ଗୁଡିକ ଅନଲାଇନ ଶିକ୍ଷାକୁ ବାଧ୍ୟତାମୂଳକ କରିବାକୁ ଅନୁରୋଧ କରୁଛନ୍ତି । ତଥାପି ବିହାରର ଗ୍ରାମାଞ୍ଚଳ ପାଇଁ ଅନଲାଇନ ଶିକ୍ଷା ଏକ ସ୍ବପ୍ନ ହୋଇରହିଛି। ବିହାରର ପୁର୍ନିଆ ଜିଲ୍ଲାରେଦେଖିବାକୁ ମିଳିଛି ଏଭଳି ସ୍ଥିତି । 51 ପ୍ରତିଶତ ସାକ୍ଷରତା ହାର ଥିବା ଏହି ଜିଲ୍ଲାରେ ଗରିବ ଛାତ୍ରଛାତ୍ରୀମାନଙ୍କ ଶିକ୍ଷା କ୍ଷେତ୍ରରେ ଦେଖିବାକୁ ମିଳିଛି କଠୋର ଆହ୍ବାନ ।
ସହରାଞ୍ଚଳର ଛାତ୍ରଛାତ୍ରୀମାନେ ଅନଲାଇନ କ୍ଲାସକୁ ସଠିକ ଉପଯୋଗ କରିପାରୁଥିବା ବେଳେ ଗ୍ରାମାଞ୍ଚଳର ଛାତ୍ରଛାତ୍ରୀମାନଙ୍କ ପାଇଁ ଦିନସାରା ବିଦ୍ୟୁତ ଯୋଗାଣ ମଧ୍ୟ ସମ୍ଭବ ନୁହେଁ । ଏପରିକି ନିରବଚ୍ଛିନ୍ନ ଇଣ୍ଟରନେଟ ସଂଯୋଗ ମଧ୍ୟ ଅନ୍ୟ ଏକ ବଡ ସମସ୍ୟା ଭାବରେ ଉଭା ହୋଇଛି । ଗରିବ ଅଭିଭାବକଙ୍କ କ୍ଷେତ୍ରରେ ଆର୍ଥିକ ସମସ୍ୟାରୁ ମୋବାଇଲ କିଣିବା ମଧ୍ୟ ସମ୍ଭବ ହୋଇପାରୁନାହିଁ । ଏହା ଫଳରେ ଡିଜିଟାଲ ବିଭାଜନ ଭଳି ପରିସ୍ଥିତି ସୃଷ୍ଟି ହେଉଛି ।
କେତେକ ସ୍ଥାନରେ ନେଟୱାର୍କ ଅସୁବିଧା କାରଣରୁ ବିନା ବ୍ୟାଘାତରେ କଲ କରିବା ମଧ୍ୟ ସମ୍ଭବ ହୋଇନଥାଏ ବୋଲି ଗ୍ରାମବାସୀ ଅଭିଯୋଗ କରିଛନ୍ତି । ଏପରିକ୍ଷେତ୍ରରେ ୱେବସାଇଟ୍ ବ୍ରାଉଜ୍ କରିବା କିମ୍ବା ଅନଲାଇନ କ୍ଲାସରେ ଯୋଗଦେବା ପ୍ରାୟ ଅସମ୍ଭବ ହୋଇଯାଏ । ବିହାର ସରକାର ଅନଲାଇନ ଶିକ୍ଷା ପାଇଁ ବାହାସ୍ଫୋଟ ମାରୁଥିବା ବେଳେ ବାସ୍ତବତା ଭିନ୍ନ ରହିଛି । ରିପୋର୍ଟ ଅନୁଯାୟୀ, ପୁର୍ନିଆର 30 ପ୍ରତିଶତ ପିଲା ବିଦ୍ୟାଳୟକୁ ଯାଆନ୍ତି ନାହିଁ, ଅନଲାଇନ ଶିକ୍ଷା ଦୃଷ୍ଟିରୁ ରାଜ୍ୟର ସାକ୍ଷରତା ହାର ଅଭିବୃଦ୍ଧି ବିପଦରେ ରହିଛି।
ପିଲାମାନଙ୍କ ପାଇଁ ଅନଲାଇନ ଶିକ୍ଷା ଗ୍ରହଣ କରିବା ଏକ ସମସ୍ୟା ହୋଇଥିବା ଜଣେ ଅଭିଭାବକ ପ୍ରକାଶ କରିଛନ୍ତି । ସେ ଆର୍ଥିକ ଦୃଷ୍ଟିରୁ ସ୍ବଚ୍ଛଳ ନଥିବା ପ୍ରକାଶ କରିବା ସହ କିଛି ଲୋକଙ୍କର ସ୍ମାର୍ଟଫୋନ ନଥିବା କହିଛନ୍ତି । ଏପରିକି ଜଣେ ଦିନ ମଜୁରିଆ ରାହୁଲ ତାଙ୍କ ପିଲାମାନଙ୍କୁ କୋରୋନା ଲକଡାଉନରେ ଶିକ୍ଷା ଦେବା ଚ୍ୟାଲେଞ୍ଜ ହୋଇଥିବା ପ୍ରକାଶ କରିଛନ୍ତି । ଏହାସହ ସରକାରଙ୍କୁ ଗରିବ ଲୋକଙ୍କ ବିଷୟରେ ଚିନ୍ତା କରିବା ଆବଶ୍ୟକ ବୋଲି ସେ କହିଛନ୍ତି ।
ଶିକ୍ଷକ ପୁଟୁଲ କୁମାରୀ କହିଛନ୍ତି, ତୃଣମୂଳ ସ୍ତରର ବାସ୍ତବତା ସରକାରୀ ରିପୋର୍ଟଠାରୁ ବହୁତ ଭିନ୍ନ। ଅନେକ ଲୋକ ଅଛନ୍ତି ଯେଉଁମାନଙ୍କର ଫୋନ ନାହିଁ। ସେଥିପାଇଁ ସେ ଜଣେ ଦୋକାନୀଙ୍କ ଠାରୁ ଅଭିଭାବକଙ୍କୁ ଫୋନ ଋଣ କରାଇଦେଇଥିବା ପ୍ରକାଶ କରିଛନ୍ତି । ଏପରି ଅନେକ ଛାତ୍ର ଅଛନ୍ତି ଯେଉଁମାନେ ଆର୍ଥିକ ଦୃଷ୍ଟିରୁ ସ୍ବଚ୍ଛଳ ନୁହଁନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
