ନୂଆଦିଲ୍ଲୀ: ସଂଧ୍ୟା ହେଲେ ଜମେ ଲୋକଙ୍କ ଭିଡ । ପିଲା ଠାରୁ ବୁଢା ସମସ୍ତେ ହୁଅନ୍ତି ଏକାଠି । ହେଲେ ଆମେ ଆପଣଙ୍କୁ କୌଣସି ପାର୍କ କିମ୍ବା ଗାର୍ଡେନ କଥା କହୁନୁ। ଆଣେ କହୁଛୁ ପୁରୁଣା ଦିଲ୍ଲୀର ହଜରତ ଶାହା ୱାଲିଉଲାହ ପବ୍ଲିକ ଲାଇବ୍ରେରୀ କଥା । ଯେଉଁଠି ପ୍ରତିଦିନ ଏକାଠି ହୁଅନ୍ତି 25ରୁ 30 ଲୋକ । ଏକାଠି ହେବା ପରେ ବହି ପଢିବା ସହ ନିଜ ନିଜ ଭିତରେ ହୁଏ ଭାଷା ଆଦାନ ପ୍ରଦାନ । ଅନେକ ଅଜଣା ଭାଷା ବି ନିଜର ନିଜର ଲାଗିଥାଏ ବୋଲି କହନ୍ତି ଏଠାକୁ ଆସୁଥିବା ଲୋକେ।
1994 ମସିହାରେ କିଛି ବହିକୁ ନେଇ ଆରମ୍ଭ ହୋଇଥିଲା ଏହି ଲାଇବ୍ରେରୀ । ପାଠାଗାରର ପ୍ରତିଷ୍ଠାତା ନିଜେ ବହି ଆଣି ଲାଇବ୍ରେରୀ ବନାଇବାର ସ୍ବପ୍ନ ଦେଖିଥିଲେ ବୋଲି କୁହନ୍ତି ଦିଲ୍ଲୀ ୱେଲଫେୟାର ଆସୋସିଏସନର ଅଧ୍ୟକ୍ଷ ସିକନ୍ଦର ଚେଙ୍ଗେଜି । ଏହାପର ଠାରୁ ଅନେକ ଲୋକ ବହି ଦାନ କରିଥାନ୍ତି । ବର୍ତ୍ତମାନ ଲାଇବ୍ରେରୀରେ 21 ହଜାର ବହି ରହିଛି । ଲାଇବ୍ରେରୀରେ ସାତ ଶହ ବର୍ଷର ଆରବିକ ଲଜିକ ବହି ମଧ୍ୟ ରହିଛି । ଏହାସହ ଉର୍ଦ୍ଦୁ ଭାଷାରେ ଭାଗବତ ଗୀତା, ହିନ୍ଦିରେ କୋରାନ ଓ ପାର୍ସି ଭାଷାରେ ରାମାୟଣ ରହିଥିବା ଏହି ଲାଇବ୍ରେରୀ ପାଠକଙ୍କୁ ନିଜ ଆଡକୁ ଟାଣିଆଣେ ।
ମିର୍ଜା ଗାଲିବଙ୍କ,ମହମ୍ମଦ ଇବ୍ରାହିମ ଜକ,ମୋମିନ ଖାନ ଓ ସୁଫିଙ୍କ କବିତା ବହି ମଧ୍ୟ ଏହି ପାଠାଗାରରେ ରହିଛି । ଗବେଷଣା ପାଇଁ ମଧ୍ୟ ଏଠାରେ ରହିଛି ଅନେକ ବହି । ଅନେକ ଛାତ୍ରଛାତ୍ରୀଙ୍କ ପ୍ରିୟ ସ୍ଥାନ ଏହି ଲାଇବ୍ରେରୀ । କୌଣସି ପାର୍ଟି ପବକୁ ନଯାଇ ଏହି ଲାଇବ୍ରେରୀରେ ସଂଧ୍ୟା ବିତାନ୍ତି କିଛି ଯୁବକ । ସର୍ବଦା ଶାନ୍ତ ଥିବା ଏହି ସ୍ଥାନ ସଂଧ୍ୟା ହେଲେ ହୋଇଉଠେ କୋଳାହଳ ।
ବିଭିନ୍ନ ବହି ଓ ବ୍ୟକ୍ତିଙ୍କ ସହ ମିଶି ଅନେକ ଭାଷା ମଧ୍ୟ ଶିଖିଥାନ୍ତି ଏମାନେ । ପଢିବା ସହ କ୍ୟାରମ ଓ ବୋର୍ଡ ଗେମ ମଧ୍ୟ ଖେଳିଥାନ୍ତି ।
ବ୍ୟୁରୋ ରିପୋର୍ଟ,ଇଟିଭି ଭାରତ
