ନୂଆଦିଲ୍ଲୀ: କୋରୋନା ଭୟରେ ମାନବିକତା ହରାଉଛି ମଣିଷ । ସାରା ଦେଶ କୋଭିଡ-19କୁ ଭୟଭୀତ ଥିବାବେଳେ, ଏକ ଲଜ୍ଜାକର ଘଟଣା ସାମ୍ନାକୁ ଆସିଛି । ମଣିପୁରର ଜଣେ ଯୁବତୀଙ୍କ ଉପରେ ଛେପ ପକାଇବା ସହ ‘କୋରୋନା’ କହି ଘଟଣାସ୍ଥଳରୁ ଫେରାର ଯୁବକ । ଯାହାକୁ ନେଇ ଥାନାରେ ଏକ ମାମଲା ରୁଜୁ ହୋଇଛି । ଏଭଳି ଏକ ଘୃଣ୍ୟ ଓ ଲଜ୍ଜାକର ଘଟଣା ଉତ୍ତର-ପଶ୍ଚିମ ଦିଲ୍ଲୀରେ ଦେଖିବାକୁ ମିଳିଛି ।
ଆମ ଦେଶର ଉତ୍ତର-ପୂର୍ବାଞ୍ଚଳ ଲୋକଙ୍କୁ ଚୀନ ସହ ତୁଳନା କରାଯାଉଥିବାର ନଜର ରହିଛି । ଏପରିକି ସେମାନେ ବିଭିନ୍ନ ସମୟରେ ଜାତିଭେଦର ଶିକାର ହୋଇଥାନ୍ତି । ତେବେ କୋରୋନାର ଉତ୍ପତ୍ତି ସ୍ଥଳୀ ଚୀନ ହୋଇଥିବାବେଳେ, ଯୁବକ ଜଣକ ଏଭଳି କାଣ୍ଡ ଭିଆଇଥିବା କୁହାଯାଉଛି । ଏନେଇ ଏକ ଟ୍ବିଟର ୟୁଜର ପିଡୀତାଙ୍କ ମୁହଁ ଲୁଚାଇ ଟି-ସାର୍ଟରେ ପଡିଥିବା ଛେପ ଫଟୋକୁ ସେୟାର କରି ଅଭିଯୋଗ କରିଥିଲେ । ଯାହାକୁ ସମସ୍ତେ ସମାଲୋଚନା କରିଥିଲେ ।
ସେପଟେ ଏହି ଘଟଣାରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ନିନ୍ଦା କରିବା ସହ ଅଭିଯୁକ୍ତ ଧରିବାକୁ ନିର୍ଦ୍ଦେଶ ଦେଇଛନ୍ତି । ଅନ୍ୟପଟେ, ଡେପୁଟି ପୋଲିସ କମିଶନର ଧାରା 509 ରୁଜୁ କରି ମାମଲାର ତଦନ୍ତ ଆରମ୍ଭ କରିଛନ୍ତି ।
