ନୂଆଦିଲ୍ଲୀ: ଦେଶକୁ ସ୍ତବ୍ଧ କରିଦେଇଥିବା ବହୁଚର୍ଚ୍ଚିତ ନିର୍ଭୟା ଗଣଦୁଷ୍କର୍ମ ମାମଲାରେ 4 ଦୋଷୀଙ୍କୁ ଏବେ ଫାଶୀ ଫାଶ ଅପେକ୍ଷା କରିଛି । ‘ସଜା-ଏ-ମୌତ’ ଦେବା ପାଇଁ ତିହାର ଜେଲରେ ପ୍ରସ୍ତୁତି ଶେଷ ହୋଇଥିବା ଜଣାଯାଇଛି । ସୂଚନା ଅନୁସାରେ ଏକାସାଙ୍ଗରେ ଚାରି ଅପରାଧୀଙ୍କୁ ଫାଶୀ ଦିଆଯିବ । 4ଜଣଙ୍କୁ ଏକାସାଙ୍ଗରେ ଫାଶୀ ଖୁଣ୍ଟରେ ଝୁଲାଇବାରେ ତିହାର ଭାରତର ପ୍ରଥମ ଜେଲ ହେବାକୁ ଯାଉଛି ।
ସୂଚନା ଅନୁସାରେ ତିହାରରେ ଚାରି ଅପରାଧୀଙ୍କୁ ଫାଶୀ ଦେବା ପାଇଁ 4ଟି କାଠଫଳକ ତିଆରି କାମ ଶେଷ ହୋଇଛି । ପୂର୍ବରୁ ଫାଶୀ ପାଇଁ ଗୋଟିଏ କାଠଫଳକରେ ଅପରାଧୀଙ୍କୁ ଛିଡା କରାଇ ଫାଶୀ ଦିଆଯାଉଥିଲା । ତିହାର ଜେଲରେ କାଠଫଳକ ତିଆରି କରିବା କାମ ପୂର୍ତ୍ତ ବିଭାଗ (PWD) ସୋମବାର ଶେଷ କରିଥିବା ସୂଚନା ରହିଛି । ତିହାର ଜେଲ ସୂତ୍ର ଅନୁସାରେ ଏହି କାମ ସମ୍ପୂର୍ଣ୍ଣ କରିବା ପାଇଁ ଜେଲ ଭିତରକୁ ଜେସିବି ମେସିନ ପଠାଯାଇଥିଲା ।
ଜେସିବି ମେସିନ ସହାୟତାରେ ତିନୋଟି ନୂଆ ଫାଶୀ ପାଇଁ କାଠଫଳକ ଓ ସୁଡଙ୍ଗ ନିର୍ମାଣ କରାଯାଇଛି । ସୂତ୍ର ଅନୁସାରେ ଫାଶୀ କାଠଫଳକ ତଳେ ମଧ୍ୟ ଏକ ସୁଡଙ୍ଗ ନିର୍ମାଣ କରାଯାଇଛି । ବର୍ତ୍ତମାନ ତିନୋଟି ନୂଆ ଫାଶୀ କାଠଫଳକ ସହ ପୁରୁଣା କାଠ ଫଳକକୁ ବଦଳାଇ ଦିଆଯାଇଛି ।
ସୂଚନାଯୋଗ୍ୟ ଯେ, 6 ଡିସେମ୍ବର 2012ରେ ନିର୍ଭୟା ଗ୍ୟାଙ୍ଗରେପ ମାମଲାରେ ଚାରି ଅପରାଧୀଙ୍କୁ ଫାଶୀଖୁଣ୍ଟରେ ଝୁଲାଇବା ପାଇଁ ଅନ୍ତିମ ପ୍ରସ୍ତୁତି ଜାରି ରହିଛି । ଅକ୍ଷୟ, ପବନ, ବିନୟ ଓ ମୁକେଶଙ୍କ ଡେଥ ୱାରେଣ୍ଟ ପଟିଆଲା ହାଉସ କୋର୍ଟରେ 7 ଜାନୁଆରୀରେ ଶୁଣାଣି ହେବ । ସମସ୍ତ ଚାରି ଅପରାଧୀ ଦୟା ଯାଚିକା ଆବେଦନ କରିବା ପାଇଁ ତିହାର ଜେଲ ପ୍ରଶାସନକୁ ଲିଖିତ ଭାବରେ ଅବଗତ କରାଇଛନ୍ତି । ମିଳିଥିବା ସୂଚନା ଅନୁସାରେ 19 ଡିସେମ୍ବରରେ ଅପରାଧୀଙ୍କ ପୁନର୍ବିଚାର ଯାଚିକା ସୁପ୍ରିମକୋର୍ଟ ଖାରଜ କରିଦେଇଥିଲେ । ଏହାର 1 ମାସ ଭିତରେ ରାଷ୍ଟ୍ରପତିଙ୍କୁ ରାଜକ୍ଷମା ଆବେଦନ କରାଯାଇପାରିବ। ପରେ ଅପରାଧୀଙ୍କ ପାଇଁ ମୃତ୍ୟୁଦଣ୍ଡ ଖାରଜ ପାଇଁ ଦୟା ଯାଚିକା ଅନ୍ତିମ ବିକଳ୍ପ ରହିବ ।
