ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ବେଶ ଉତ୍ସାହର ସହ ଚାଲିଛି ଗଣତନ୍ତ୍ରର ପର୍ବ । ମତଦାନ ପାଇଁ ସକାଳୁ ସକାଳୁ ପୋଲିଂ ବୁଥମାନଙ୍କରେ ଜମିଛି ଲୋକଙ୍କ ଭିଡ । ପ୍ରବଳ ଥଣ୍ଡା ସତ୍ତ୍ବେ ମତଦାନ ପାଇଁ କମିନି ଦିଲ୍ଲୀବାସୀଙ୍କ ଜୋଶ । ଏମିତିରେ ପଛରେ ପଡିନାହାଁନ୍ତି ଦିଲ୍ଲୀର ବରିଷ୍ଠ ନାଗରିକ । ସେମାନଙ୍କ ମତ ସାବ୍ୟସ୍ତ କରିବା ଜୋଶ ଆଗରେ ଫିକା ପଡିଛି ବୟସ।
ବରିଷ୍ଠ ନାଗରିକଙ୍କ ଏହି ଧାଡିରେ ସବୁଠାରୁ ଆଗରେ ରହିଛନ୍ତି 110 ବର୍ଷୀୟା କାଲିତାରା ମଣ୍ଡଲ । ସେ ଏସଡିଏମସି ପ୍ରାଇମେରୀ ସ୍କୁଲରେ ମତ ସାବ୍ୟସ୍ତ କରିଥିଲେ । ପରେ ପରେ 108 ବର୍ଷୀୟ ସିତାରା ଦେବୀ ବାବରପୁରସ୍ଥିତ ନିଗମ ବିଦ୍ୟାଳୟରେ ଭୋଟଦାନ କରିଥିଲେ । ସେହିପରି 93 ବର୍ଷୀୟ କର୍ଣ୍ଣଲ ଅମୃତଲାଲ ଖନ୍ନା ଗ୍ରେଟର କୈଲାଶ ପାର୍ଟ 2ରେ ବଳବନ୍ତ ଭବନ ସ୍କୁଲରେ ଭୋଟ ଦେଇ ନିଜ ଅଧିକାର ସାବ୍ୟସ୍ତ କରିଛନ୍ତି ।
ବରିଷ୍ଠ ନାଗରିକଙ୍କ ଏହି ଦାୟିତ୍ବବୋଧତା ଆଜିର ଯୁବପିଢିଙ୍କ ପାଇଁ ମାର୍ଗଦର୍ଶନ କହିଲେ କିଛି ଭୁଲ ହେବ ନାହିଁ । ସେପଟେ ଏହି ବରିଷ୍ଠ ଭୋଟରମାନଙ୍କୁ ଉତ୍ସାହିତ କରିବା ପାଇଁ ସମ୍ପୃକ୍ତ ପୋଲିଂ ବୁଥମାନଙ୍କରେ ଫୁଲତୋଡା ଦେଇ ସେମାନଙ୍କୁ ସମ୍ବର୍ଦ୍ଧିତ କରାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
