ନୂଆଦିଲ୍ଲୀ: ଆଞ୍ଚଳିକ ଭାଷାକୁ ପ୍ରୋତ୍ସାହନ ଯୋଗାଇବାକୁ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ପକ୍ଷରୁ ଆଞ୍ଚଳିକ ଭାଷା ବ୍ୟବହାରକାରୀଙ୍କ ପାଇଁ ମାଗଣା ଅନ୍ତରାଷ୍ଟ୍ରୀୟ ଡୋମେନ ନାମ ଉପଲବ୍ଧ କରାଯାଇଛି । ଏନେଇ ଶୁକ୍ରବାର ଘୋଷଣା କରିଛି ନ୍ୟାସନାଲ ଏକ୍ସଚେଞ୍ଜ ଅଫ ଇଣ୍ଡିଆ । 22ଟି ଭାରତୀୟ ସରକାରୀ ଭାଷା ମଧ୍ୟରୁ ପଞ୍ଜୀକୃତ କୌଣସି ବି ଭାଷା ପାଇଁ ଏକ ମାଗଣା ଅନ୍ତରାଷ୍ଟ୍ରୀୟ ଡୋମେନ ନାମ ଉପଲବ୍ଧ ହେବ ।
ଏନେଇ ଆବେଦନକାରୀ ସ୍ଥାନୀୟ ଭାଷାରେ ଏକ ମାଗଣା ମେଲ ପାଇବେ । ଆଇଡିଏନ(IDN) ଡୋମେନ ନାମ ଗ୍ରହଣ ଏବଂ ସ୍ଥାନୀୟ ଭାଷାର ପ୍ରସାର କ୍ଷେତ୍ରରେ ପ୍ରୋତ୍ସାହନ ପାଇଁ ଏହି ଅଫର ସୃଷ୍ଟି କରାଯାଇଥିବା ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ପକ୍ଷରୁ ଜାରି ବିଜ୍ଞପ୍ତିରେ ଉଲ୍ଲେଖ ରହିଛି । ଚଳିତ ମାସ 31 ତାରିଖରୁ ଯେଉଁ ସ୍ଥାନୀୟ ଭାଷା ବ୍ୟବହାରକାରୀ ନିଜ ଡୋମେନକୁ ନବୀକରଣ କରିବେ, ସେମାନେ ହିଁ ଏହି ଅଫର ଉପଭୋଗ କରିପାରିବେ ।
ନ୍ୟାସନାଲ ଇଣ୍ଟରନେଟ ଏକ୍ସଚେଞ୍ଜ ଅଫ ଇଣ୍ଡିଆ ଏକ ଅଣ ଲାଭଜନକ ସଂସ୍ଥା । ଏହା 2003 ମସିହାରୁ ଭାରତୀୟ ନାଗରିକଙ୍କ ପାଇଁ ଇଣ୍ଟରନେଟ ଟେକ୍ନୋଲୋଜି ବିସ୍ତାର କରିବା ଦିଗରେ କାର୍ଯ୍ୟ କରୁଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
