ନୂଆଦିଲ୍ଲୀ: ଆସନ୍ତା 21ରେ ସମଗ୍ର ଦେଶ ପାଳିବ ରଙ୍ଗର ପର୍ବ ହୋଲି । ଏନେଇ ସମସ୍ତ ପ୍ରସ୍ତୁତି ମଧ୍ୟ ପ୍ରାୟତଃ ସମାପ୍ତ ହୋଇସାରିଛି । ତେବେ ରଙ୍ଗ ଖେଳରେ ମଜି ଯିବା ପୂର୍ବରୁ ହୋଲିକା ଦହନ କାର୍ଯ୍ୟକ୍ରମ ହେବ । ଦେଶର ଅନେକ ରାଜ୍ୟରେ ଆଜି ସନ୍ଧ୍ୟାରେ ହୋଲିକା ଦହନ କରାଯିବ । ତେବେ ହୋଲିକା ଦହନର ପ୍ରସ୍ତୁତି ମଧ୍ୟରେ ମୁମ୍ବାଇରେ ଏକ ଏଭଳି ଦୃଶ୍ୟ ଦେଖିବାକୁ ମିଳିଛି ଯାହା ଏବେ ଚର୍ଚ୍ଚାର ବିଷୟ ପାଲଟିଛି ।
ମୁମ୍ବାଇର ବର୍ଲି ଅଞ୍ଚଳରେ ହୋଲିକା ସହ ଜୈଶ-ଏ-ମହମ୍ମଦ ଆତଙ୍କୀ ସଙ୍ଗଠନର ମୁଖ୍ୟ ମସୁଦ ଅଜହରର କୁଶ ପୁତ୍ତଳିକା ଦହନ କରାଯିବ । ଏନେଇ ମସୁଦ ଅଜହରର ଏକ ବିରାଟ କୁଶ ପୁତ୍ତଳିକା ପ୍ରସ୍ତୁତ କରାଯାଇଛି ।
ତେବେ ମସୁଦ ଅଜହର ବ୍ୟତିତ ଯୁବପିଢୀକୁ ନଷ୍ଟ କରୁଥିବା ପବ୍ଜି ଗେମର ଏକ ପୁତ୍ତଳା ମଧ୍ୟ ପ୍ରସ୍ତୁତ କରାଯାଇଛି । ଏହାକୁ ହୋଲିକା ସହ ମିଶାଇ ଦହନ କରାଯିବ ବୋଲି ଜଣା ପଡିଛି ।
ବିଶ୍ବକୁ ଆତଙ୍କବାଦୀମୁକ୍ତ କରିବାର ବାର୍ତ୍ତା ଦେବାପାଇଁ କୁଖ୍ୟାତ ଆତଙ୍କବାଦୀ ମସୁଦ ଅଜହରର ପୁତ୍ତଳିକାକୁ ଦହନ କରାଯାଉଛି ବୋଲି ଆୟୋଜକ ମାନେ କହିଛନ୍ତି ।
