ଫିରୋଜପୁର(ପଞ୍ଜାବ): କିଛିଦିନ ବ୍ୟବଧାନ ପରେ ପୁଣି ପଞ୍ଜାବ ସୀମାରେ ଉଡିଲା ପାକିସ୍ତାନୀ ଡ୍ରୋନ । ସୋମବାର ବିଳମ୍ବିତ ରାତିରେ ପଞ୍ଜାବର ଫିରୋଜପୁର ଜିଲ୍ଲାରେ ଏହି ଡ୍ରୋନ ଦେଖିବାକୁ ମିଳିଛି । କିଛି ପାକିସ୍ତାନୀ ଡ୍ରୋନ ଉପରେ ବିଏସଏଫ ଯବାନ ଗୁଳିମାଡ କରିଥିବା ସୂଚନା ରହିଛି ।
ମିଳିଥିବା ସୂଚନାନୁସାରେ ସୋମବାର ରାତି ସାଢେ 10ଟାରେ ପ୍ରଥମେ ଏହି ଡ୍ରୋନ ଠାବ ହୋଇଥିଲା । ହୁସେନୱାଲା ସେକ୍ଟରରେ ବିଏସଏଫ ପକ୍ଷରୁ ଏହାକୁ ନୋଟିସ କରାଯାଇଥିଲା । ପାଟ୍ରୋଲିଂ ବେଳେ ଯବାନ ଡ୍ରୋନ ଉଡୁଥିବାର ଦେଖିଥିଲେ । ସନ୍ଦେହ ହେବାରୁ ଅଧିକ ତଦନ୍ତ କରାଯାଇଥିଲା । ତେବେ ପାକିସ୍ତାନ ପଟୁ ଏହି ଡ୍ରୋନ ଆସୁଥିବାର ଜଣାପଡିଥିଲା । ପ୍ରଥମେ କେବଳ ଗୋଟିଏ ଡ୍ରୋନ ଦେଖାଯାଇଥିବାବେଳେ ଧିରେ ଧିରେ ଏକାଧିକ ଡ୍ରୋନ ନଜର ଆସିଥିଲେ ।
ତେବେ ଯବାନଙ୍କ ପକ୍ଷରୁ କେତେକ ଡ୍ରୋନକୁ ଗୁଳି ମାରି ଖସାଇ ଦିଆଯାଇଥିବାର ସୂଚନା ରହିଛି । ଏହି ଡ୍ରୋନ ପାକିସ୍ତାନ ପଟୁ ଆସିଥିବାବେଳେ କିଏ ଓ କାହିଁକି ଏହାକୁ ଉଡାଉଥିଲା ସେ ସମ୍ପର୍କରେ ଅଧିକ ତଦନ୍ତ ଜାରି ରହିଛି । ସୂଚନାଯୋଗ୍ୟ ଏହା ପ୍ରଥମ ଘଟଣା ନୁହେଁ, ଯେବେ ପାକିସ୍ତାନ ପଟୁ ଡ୍ରୋନ ଭାରତରେ ପ୍ରବେଶ କରିଛି । ପୂର୍ବରୁ ଅକ୍ଟୋବର 9ରେ ସମାନ ଜାଗାରେ ପାକିସ୍ତାନ ପକ୍ଷରୁ ଡ୍ରୋନ ଆସୁଥିବାର ଦେଖିବାକୁ ମିଳିଥିଲା । ଉଭୟ ବିଏସଏଫ ଓ ପଞ୍ଜାବ ପୋଲିସ ପକ୍ଷରୁ ଏହାର ତଦନ୍ତ କରାଯାଇଥିଲା ।
ଲଗାତାର ପାକିସ୍ତାନ ପଟୁ ଡ୍ରୋନ ଆସିବାକୁ ନେଇ ସନ୍ଦେହ ସୃଷ୍ଟି ହୋଇଛି । ପାକ୍ କୌଣସି ପ୍ରକାର ଚାଲ ଚଲାଇଥିବାର ଆଶଙ୍କା ଦେଖାଦେଇଛି । ଡ୍ରୋନ ଦ୍ବାରା ଭାରତୀୟ ସେନା ଉପରେ ନଜର ରଖୁଥିବାର ଗୁଇନ୍ଦା ସୂଚନା ମିଳିଛି । ପୋଲିସ ଏହା ଉପରେ ଅଧିକ ତଦନ୍ତ ଜାରି ରଖିଛି ।
