ଲକ୍ଷ୍ନୌ: ଆଖୁ ଫସଲ ନଷ୍ଟ ହେବାରୁ 15 ବର୍ଷର ନାବାଳକକୁ ପିଟିପିଟି ହତ୍ୟା । ଏଭଳି ଏକ ଅଭାବନୀୟ ଘଟଣା ଘଟିଛି ଉତ୍ତରପ୍ରଦେଶ ଶାହାଜାହାନପୁରର ସିସାଇୟା ଗ୍ରାମରେ । ଏହା ପରେ ଘଟଣାସ୍ଥଳରୁ ଫେରାର ହୋଇଯାଇଥିଲେ ତିନି ଅଭିଯୁକ୍ତ । ଆଇପିସି ଧାରା 302 ଅନୁଯାୟୀ ଏହି ତିନି ଜଣଙ୍କ ବିରୋଧରେ ଏକ ମାମଲା ରୁଜ୍ଜୁ କରିଛି ପୋଲିସ । ତେବେ ଅଭିଯୁକ୍ତଙ୍କୁ ସୁରକ୍ଷା ଦେଉଥିବା ଅଭିଯୋଗ କରି ସମାଜବାଦୀ ଦଳର ଜିଲ୍ଲା ସଭାପତି ତନଭୀର ଖାନଙ୍କ ସହ ମୃତ ବାଳକଙ୍କ ପରିବାରର ସଦସ୍ୟମାନେ ଶାହାଜାହାନପୁରର ବରିଷ୍ଠ ଅଧୀକ୍ଷକ (ଏସଏସପି)ଙ୍କ କାର୍ଯ୍ୟାଳୟ ବାହାରେ ବିକ୍ଷୋଭ ପ୍ରଦର୍ଶନ କରିଥିଲେ।
ସୂଚନାମୁତାବକ, ଶନିବାର ସନ୍ଧ୍ୟାରେ ନାବାଳକ କୁଲଦୀପ ଯାଦବ ତାଙ୍କ ସାଙ୍ଗମାନଙ୍କ ସହ ଖେଳୁଥିବା ସମୟରେ ଚାଷୀ ସାଧୁ ସିଂ ଏବଂ ତାଙ୍କ ଭାଇ ଧର୍ମେନ୍ଦ୍ର ସିଂଙ୍କ ଆଖୁ କ୍ଷେତ ଭିତରକୁ ପଳାଇଥିଲେ । ଫଳରେ ଧର୍ମେନ୍ଦ୍ର, ସାଧୁ ଏବଂ ତାଙ୍କ ପୁଅ ଭୁପିନ୍ଦର କୁଲଦୀପଙ୍କୁ ବାଡ଼ିରେ ଅତି ନିର୍ମମ ଭାବରେ ପିଟିବା ଆରମ୍ଭ କରିଥିଲେ। ଏହା ପରେ ଅଭିଯୁକ୍ତମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ ।
