ନୂଆଦିଲ୍ଲୀ: 2019 ଲୋକସଭା ନିର୍ବାଚନ ମୈଦାନରେ ବାଜି ମାରିନେଇଛି ବିଜେପି । ''ଅବକି ବାର, 300 ପାର'' ନାରାକୁ ସତ ପ୍ରମାଣିତ କରିବା ସହ ସର୍ବମୋଟ 303ଟି ସିଟ ହାସଲ କରି ପୁଣି ଥରେ ପ୍ରଧାନମନ୍ତ୍ରୀର ତାଜ ପିନ୍ଧିଛନ୍ତି ମୋଦି । ତେବେ ଉତ୍ତରପ୍ରଦେଶରେ ପାର୍ଟିର ପ୍ରଦର୍ଶନ ସବୁଠୁ ଭଲ ରହିବା ସହ 62ଟି ସିଟରେ ବିଜେପି ବିଜୟ ଲାଭ କରିଛି ।
ତେବେ ଚଳିତ ଥର ମୋଦିଙ୍କ କ୍ୟାବିନେଟରେ ପୁରୁଖା ପୁରୁଣା ମୁହଁ ବଦଳରେ ନୂଆ ମୁହଁ ଦେଖିବାକୁ ମିଳିଛି । ସେଥିମଧ୍ୟରୁ ପୁରୁଣା ନେତ୍ରୀ ମେନକା ଗାନ୍ଧୀ ବି ବାଦ ପଡିଯାଇଛନ୍ତି । ଏହି ଘଟଣା ପରେ ସୁଲତାନପୁରର ପୂର୍ବତନ ସାଂସଦ ମେନକା ଗାନ୍ଧୀ ନିଜର ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି କି ଲୋକଙ୍କ ସମର୍ଥନ ଯୋଗୁଁ ସୁଲତାନପୁରରେ 3ଥର ସାଂସଦ ହେବା ଛୋଟ କଥା ନୁହେଁ । ତାହା ପୁଣି ବିପୁଳ ମାତ୍ରାରେ ଭୋଟ ଓ ପ୍ରବଳ ଜନସମର୍ଥନ ସହ ।
ଏନେଇ ମେନକା ଗତ ରବିବାର ସୁଲତାନପୁର ଗସ୍ତ କରିବା ସହ ତାଙ୍କ ପ୍ରତି ସେଠାକାର ଜନସାଧାରଣଙ୍କ ବିପୁଳ ମାତ୍ରାରେ ସମର୍ଥନ ପାଇଁ ଧନ୍ୟବାଦ ଜଣାଇଛନ୍ତି । ଏହାସହ ଉକ୍ତ ଜିଲ୍ଲାରେ ବିଭିନ୍ନ ପ୍ରକାର ଉନ୍ନତିମୂଳକ କାର୍ଯ୍ୟ କରିବାକୁ ପ୍ରତିଶୃତି ଦେଇ ଆସିଛନ୍ତି ।
ତେବେ ଚଳିତ ଲୋକସଭା ନିର୍ବାଚନରେ ମେନକା ଗାନ୍ଧୀଙ୍କ ପୁଅ ବରୁଣ ଗାନ୍ଧୀଙ୍କୁ ମଧ୍ୟ ମୋଦିଙ୍କ କ୍ୟାବିନେଟରେ କୌଣସି ପଦପଦବୀ ମିଳିନାହିଁ । ହେଲେ ଏହି ମାମଲାରେ ମେନକାଙ୍କୁ ପଚାରିବାରୁ ସେ ଚୁପ ରହିବା ସହ କଥାକୁ ଏଡାଇ ଦେଇଛନ୍ତି । ଗଣମାଧ୍ୟମ ପ୍ରତିନିଧିଙ୍କୁ ପ୍ରଶ୍ନକୁ ଅଣଦେଖା କରିବା ସହ କହିଛନ୍ତି କି, ଆଚ୍ଛା ତୋ ମେଁ ଚଲତି ହୁଁ... ।
