ଲକ୍ଷ୍ନୌ: ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ବାସଭବନ ସମେତ 50 ଟି କୋଠା ଉପରେ ବୋମା ପକାଇବାକୁ ଧମକ ଦେଇଥିବା ଯୁବକଙ୍କୁ ରବିବାର ଗିରଫ କରିଛି ପୋଲିସ । ଏନେଇ ଲକ୍ଷ୍ନୌର ଗୌତମପଲ୍ଲୀ ପୋଲିସ ଷ୍ଟେସନରେ ଏକ ମାମଲା ରୁଜୁ କରାଯାଇଥିଲା।
ଏହି ଘଟଣାରେ ପୋଲିସ ଯୁବକଙ୍କୁ ଖୋଜୁଥିଲା। ଅଭିଯୁକ୍ତ ଯୁବକ ଗୋଣ୍ଡା ଜିଲ୍ଲାର ଚାପିଆ ପୋଲିସ ଷ୍ଟେସନ ଅଞ୍ଚଳର ଟିକର ଗାଁର ବୋଲି ଜଣାପଡିଛି । ଏସିପି ସେଣ୍ଟ୍ରାଲ ଅଭୟ କୁମାର ମିଶ୍ରଙ୍କ ଅନୁଯାୟୀ, ଅଭିଯୁକ୍ତଙ୍କୁ ଗୋଣ୍ଡାରୁ ଗିରଫ କରାଯାଇଛି । ତାକୁ ଲକ୍ଷ୍ନୌ ଅଣାଯିବ।
ଶନିବାର ଏହି ଧମକ ପାଇବା ପରେ ଲକ୍ଷ୍ନୌ ପୋଲିସ କମିଶନର ସୁଜିତ ପାଣ୍ଡେ ସୂଚନା ଦେଇଛନ୍ତି ଯେ, ଶୁକ୍ରବାର ଅପରାହ୍ନରେ ୟୁପି 112ର ହ୍ବାଟସ ଆପ ନମ୍ବରକୁ କେହି ମେସେଜ ପଠାଇ ଧମକ ଦେଇଥିଲା । ମେସେଜରେ ଉଲ୍ଲେଖଥିଲା ଯେ, ସିଏମ ଏବଂ 112 ସେବା ମୁଖ୍ୟାଳୟ ସମେତ ଅନ୍ୟ 50ଟି ଗୁରୁତ୍ୱପୂର୍ଣ୍ଣ କୋଠା ଉପରେ ବୋମା ପକାଯିବ। ତେବେ ଏହି ଧମକପୂର୍ଣ୍ଣ ବାର୍ତ୍ତା ପଛରେ କି ଉଦ୍ଦେଶ୍ୟ ରହିଛି ତାହା ଏଯାଏଁ ଜଣାପଡିନାହିଁ ।
