ଚେନ୍ନାଇ: ଲକଡାଉନରେ ଫସିଥିବା ପ୍ରବାସୀ ଶ୍ରମିକଙ୍କୁ ଖାଦ୍ୟ, ଆଶ୍ରୟ ଏବଂ ଚିକିତ୍ସା ସୁବିଧା ସୁନିଶ୍ଚିତ କରିବାକୁ ତାମିଲନାଡୁ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ମାଡ୍ରାସ ହାଇକୋର୍ଟ ।
କୋର୍ଟ ପ୍ରବାସୀ ଶ୍ରମିକଙ୍କ ମାମଲାରେ ଶୁଣାଣି ସମୟରେ ଆବେଦନକାରୀ କହିଛନ୍ତି ଯେ, ପ୍ରବାସୀ ଶ୍ରମିକ ରେଲୱେ ଷ୍ଟେସନରେ ବିନା ଖାଦ୍ୟରେ ଅଛନ୍ତି । ଯାହାକୁ ନେଇ କୋର୍ଟ ତାମିଲନାଡୁ ସରକାରଙ୍କୁ ପ୍ରବାସୀ ଶ୍ରମିକଙ୍କୁ ପର୍ଯ୍ୟାପ୍ତ ପରିମାଣର ଖାଦ୍ୟ ଯୋଗାଇବାକୁ ନିର୍ଦ୍ଦେଶ ଦେଇଛନ୍ତି । ଏଥିସହ ପ୍ରବାସୀ ଶ୍ରମିକଙ୍କ ରହିବା ବ୍ୟବସ୍ଥା ଏବଂ ଚିକିତ୍ସା ସୁବିଧା ସୁନିଶ୍ଚିତ କରିବାକୁ କହିଛନ୍ତି ।
ଏହାପୂର୍ବରୁ ମହାରାଷ୍ଟ୍ରରେ ଫସି ରହିଥିବା 400 ତାମିଲ ଶ୍ରମିକଙ୍କୁ ଫେରାଇ ଆଣିବା ନେଇ ଏକ ଯାଚିକାର ଶୁଣାଣି ସମୟରେ କୋର୍ଟ କହିଥିଲେ ଯେ, ଗଣମାଧ୍ୟମରେ ପ୍ରସାରିତ ହେଉଥିବା ପ୍ରବାସୀ ଶ୍ରମିକଙ୍କ ଅବସ୍ଥା ଅତ୍ୟନ୍ତ ଦୁଃଖଦାୟକ ।
ଏନେଇ କୋର୍ଟ ଉଭୟ କେନ୍ଦ୍ର ଏବଂ ରାଜ୍ୟ ସରକାରଙ୍କୁ ପ୍ରବାସୀ ଶ୍ରମିକଙ୍କ ସବିଶେଷ ତଥ୍ୟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି । ଏଥିସହ ପ୍ରତ୍ୟେକ ରାଜ୍ୟରେ କେତେ ଜଣ ପ୍ରବାସୀ ଶ୍ରମିକ ରହିଛନ୍ତି, କେତେ ଜଣଙ୍କୁ ସ୍ବରାଜ୍ୟ ପଠାଯାଇଛି ଏବଂ କେତେ ଶ୍ରମିକଙ୍କ ଯାତ୍ରା ସମୟରେ ମୃତ୍ୟୁ ଘଟିଛି ଏସବୁର ବିବରଣୀ ମାଗିଛନ୍ତି କୋର୍ଟ । ଜୁନ୍ 8 ସୁଦ୍ଧା ସମସ୍ତ ରିପୋର୍ଟ ଦାଖଲ କରିବାକୁ କୋର୍ଟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ।
