ନୂଆଦିଲ୍ଲୀ: ସରକାରୀ ନିୟମକୁ ଉଲ୍ଲଙ୍ଘନ କରିଛନ୍ତି କି ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ? 17 ଟି ଓବିସି (OBC) ଶ୍ରେଣୀର ଜନଜାତିଙ୍କୁ ଅନୁସୂଚୀତ ଜାତିରେ ସାମିଲ କରିବା ୟୁପି ସରକାରଙ୍କୁ ମହଙ୍ଗା ପଡିପାରେ । କାରଣ ଯୋଗୀ ଆଦିତ୍ୟନାଥଙ୍କ ନିଷ୍ପତ୍ତିକୁ ବିରୋଧ କରୁଛନ୍ତି କେନ୍ଦ୍ର ସରକାର । ଅନୁସୂଚୀତ ଜାତିରେ ଓବିସି ଶ୍ରେଣୀ ସାମିଲ ଭୁଲ ନିଷ୍ପତ୍ତି ବୋଲି କହିଛନ୍ତି ସମାଜିକ ନ୍ୟାୟ ଏବଂ ଅଧିକାର ମନ୍ତ୍ରୀ ଥୱରଚାନ୍ଦ ଗେହଲଟ ।
ବହୁଜନ ସମାଜ ପାର୍ଟିର ସତୀଶ ଚନ୍ଦ୍ର ମିଶ୍ର ପ୍ରଥମେ ଏହି ପ୍ରସଙ୍ଗ ଉଠାଇଥିଲେ । ସେ କହିଥିଲେ ଯେ 17ଟି ଓବିସି ଶ୍ରେଣୀର ଜନଜାତିଙ୍କୁ ଅନୁସୂଚୀତ ଜାତିରେ ସାମିଲ କରାଇବା ୟୁପି ସରକାରଙ୍କ ଭୁଲ ନିଷ୍ପତ୍ତି । ଏହା ଅସାମ୍ବିଧାନିକ । କାରଣ ଅନୁସୂଚିତ ଜାତି, ଅନୁସୂଚିତ ଜନଜାତି ଏବଂ ଅନ୍ୟାନ୍ୟ ପଛୁଆ ବର୍ଗର ତାଲିକାକୁ ବଦଳାଇବାର ଅଧିକାର କେବଳ ସଂସଦକୁ ଦିଆଯାଏ ।
ଏଭଳି ମନ୍ତବ୍ୟ ଥୱରଚାନ୍ଦ ଗେହଲଟ ମଧ୍ୟ ଦେଇଛନ୍ତି । ସେ କହିଛନ୍ତି, ପୂର୍ବରୁ ମଧ୍ୟ ଏଭଳି ପ୍ରସ୍ତାବ ସଂସଦକୁ ପଠାଯାଇଥିଲା । କିନ୍ତୁ ସେଠାରେ ସହମତି ମିଳିନଥିଲା । ତେଣୁ ଏଭଳି କାମ ରାଜ୍ୟ ସରକାର ନକରିବା ଭଲ । ଏହାସହ ସରକାରୀ ନିୟମକୁ ପାଳନ କରିବା ଉଚିତ । ନଚେତ ଏହି ମାମଲା ଅଦାଲତରେ ପହଞ୍ଚିପାରେ । ସେପଟେ ୟୁପିରେ ଯୋଗୀ ସରକାର ଯେଉଁ 17 ଟି ଓବିସି ଶ୍ରେଣୀଙ୍କୁ ଅନୁସୂଚୀତ ଜାତିରେ ସାମଲ କରାଇଛନ୍ତି ସେମାନଙ୍କୁ ଏବେ କୌଣସି ଲାଭ କିମ୍ବା ସରକାରୀ ସୁବିଧା ମିଳିବ ନାହିଁ । କାରଣ ରାଜ୍ୟ ସରକାରଙ୍କ ହାତରେ ଜାତି ବଦଳାଇବା ଭଳି କାମ ନଥାଏ ।
