କାନପୁର: ଫର୍ଣ୍ଣିଚର ଗୋଦାମରେ ଭୟାବହ ଅଗ୍ନିକାଣ୍ଡ । ଜଳିଗଲା ବହୁ ମୂଲ୍ୟବାନ ସାମଗ୍ରୀ । 22 ଘଣ୍ଟାର ଚେଷ୍ଟା ପରେ ନିଆଁକୁ ଆୟତ୍ତ କଲା ଅଗ୍ନିଶମ ବିଭାଗ । ଏହି ଅଗ୍ନିକାଣ୍ଡରେ 7 କୋଟିରୁ ଉର୍ଦ୍ଧ୍ବ ଟଙ୍କାର ଜିନିଷ ପୋଡି ପାଉଁଶ ହୋଇ ଯାଇଥିବା ସୂଚନା ମିଳିଛି । ଏହି ନିଆଁକୁ ଆୟତ୍ତ କରିବା ପାଇଁ 3ଟି ଅଗ୍ନିଶମ ବିଭାଗ ଟିମ ନିୟୋଜିତ ହୋଇଥିଲେ ।
କାନପୁର ସହରର ଲଖନ କଲୋନୀ ଅଞ୍ଚଳରେ ଥିବା ରାକେଶ ଫର୍ଣ୍ଣିଚର ଗୋଦାମରେ କୌଣସି କାରଣରୁ ନିଆଁ ଲାଗିଯାଇଥିଲା । ତେବେ ନିଆଁର ପ୍ରକୋପ ଏତେ ମାତ୍ରାରେ ଥିଲା ଯେ, ଆଖି ପିଛୁଳାକେ ପାଖରେ ଥିବା ଅନ୍ୟ 4ଟି ଦୋକାନକୁ ମଧ୍ୟ ବ୍ୟାପୀ ଯାଇଥିଲା । ଖବରପାଇ ଅଗ୍ନିଶମ ବିଭାଗ ଟିମ ପହଞ୍ଚି ନିଆଁକୁ କାବୁ କରିବାକୁ ଚେଷ୍ଟା କରିଥିଲେ ସୁଦ୍ଧା ତାହା ଆୟତ୍ତ ହୋଇନଥିଲା । ଫଳରେ ଚାହୁଁ ଚାହୁଁ ସବୁକିଛି ଜଳି ପାଉଁଶ ହୋଇଗଲା ।
ଘଟଣାସ୍ଥଳରେ ଡିଏମ୍ ହୀରା ଲାଲ, ଏସପି ଗମେଶ ପ୍ରସାଦ ଶାହ ଓ ଏଏସପିଙ୍କ ସମେତ ବହୁ ପୋଲିସ ଫୋର୍ସ ପହଞ୍ଚିଥିଲେ । ସେପଟେ ପ୍ରଭାରୀ ଅଗ୍ନିଶମ ଅଧିକାରୀଙ୍କ କହିବାନୂଯାୟୀ, ଏହି ଗୋଦାମ ବେଆଇନ ଭାବେ ନିର୍ମିତ ହୋଇଥିଲା । ଏହା ବ୍ୟତୀତ ଏଥିରେ ଅଗ୍ନିନିରାପକ ଯନ୍ତ୍ର ନଥିଲା । ଯେଉଁଥି ପାଇଁ ପ୍ରାଥମିକ ଭାବେ ନିଆଁକୁ ଆୟତ୍ତ କରାଯାଇପାରିଲାନାହିଁ ।
