ନୂଆଦିଲ୍ଲୀ: ଦେଶର ରାଜଧାନୀରେ ମୃତ୍ୟୁର ଲୋମ ଟାଙ୍କୁରା ଦୃଶ୍ୟ । ପଶ୍ଚିମ ଦିଲ୍ଲୀ ଅଞ୍ଚଳରେ ଘଟିଛି ଏପରି ଅଭାବନୀୟ ଘଟଣା । ମାତ୍ର ଗୋଟିଏ ଚାପୁଡ଼ାରୁ ଘଟଣା ଜୀବନ ଯିବା ଯାଏଁ ଘଟିଛି । ଆଉ ଏହି ମୃତ୍ୟୁର ଲାଇଭ ରେକର୍ଡ କରିଛି ସିସିଟିଭି କ୍ୟାମେରା । ଦିଲ୍ଲୀର ରଘୁବୀର ଅଞ୍ଚଳରେ ଜୁଲାଇ 8 ତାରିଖରେ ଘଟିଥିବା ଏହି ଘଟଣାକୁ କଏଦ କରିଛି ସିସିଟିଭି । ସବୁଠାରୁ ବଡ଼କଥା ହେଉଛି ହତ୍ୟାକାଣ୍ଡ ଭିଆଇଥିବା ହତ୍ୟାକାରୀ ହେଉଛନ୍ତି ନାବାଳକ ।
କଲୋନୀରେ ବାଇକ ଷ୍ଟଣ୍ଟ କରୁଥିବା ଲବ୍କି ନାମକ ଜଣେ ନାବାଳକକୁ ମୃତକ ମନୀଷ ତାଗିଦ କରିବା ସହ ଏକ ଚାପୁଡ଼ା ମାରିଥିଲା । ଗଳିରେ ଛୋଟ ପିଲା ଖେଳକୁଦ କରୁଛନ୍ତି, ତେଣୁ ଦୁର୍ଘଟଣା ଘଟିବାର ସମ୍ଭାବନା ରହିଥିବା ନେଇ ମଧ୍ୟ ମନୀଷ ବାଇକ ଚଳାଉଥିବା ଉକ୍ତ ନାବାଳକକୁ କହିଥିଲା । ପରେ ଲବ୍କିର ପରିବାର ଲୋକ ଆସି ମନୀଷକୁ ହତ୍ୟା କରିବା ନେଇ ଧମକ ଦେଇଥିଲେ । ଘଟଣା ଏପରି ହେଲା କି ମନୀଷର ପରିବାର ସଦସ୍ୟ କହିବା ପରେ ମନୀଷ ଘଟଣାକୁ ନେଇ ଭୁଲ ମଧ୍ୟ ମାଗିଥିଲା ।
ଏହାପରେ ମଧ୍ୟ ନାବାଳକ ଲବ୍କିର ରାଗ ଯାଇନଥିଲା । ଲବ୍କି ଏବଂ ତାର ତିନିଜଣ ସାଙ୍ଗ ମିଶି ରଚିଥିଲେ ହତ୍ୟା ଷଡ଼ଯନ୍ତ୍ର । ମନୀଷ ଏକୁଟିଆ ଆସୁଥିବାର ସୁଯୋଗ ନେଇ ତାକୁ ହତ୍ୟା କରିଛନ୍ତି ଏହି ନାବାଳକମାନେ । ଯାହାର ଭିଡ଼ିଓ କଏଦ କରିଛି ସିସିଟିଭି । ସେପଟେ ମନୀଷ ପରିବାରକୁ ଚଳାଉଥିଲା । ପରିବାରରେ ସେ ହିଁ ଏକମାତ୍ର ରୋଜଗାରକ୍ଷମ ଥିଲା ବୋଲି କହିଛନ୍ତି ମନୀଷର ଭଉଣୀ ।
ବ୍ୟୁରୋ ରିପୋର୍ଟ, ଇଟିଭି ଭାରତ
