ନୂଆଦିଲ୍ଲୀ : ପୂର୍ବ ଲଦାଖର ଗଲୱାନ ଘାଟିରେ ଭାରତ-ଚୀନ ସୈନିକଙ୍କ ମଧ୍ୟରେ ହୋଇଥିବା ସଂଘର୍ଷ ପରେ ଉଭୟ ଦେଶ ମଧ୍ୟରେ ଯୁଦ୍ଧ ପରିସ୍ଥିତି ଉପୁଜିଛି । ତେବେ ଏହାକୁ ଦୃଷ୍ଟିରେ ରଖି ଭାରତ ଲଦାଖ ସୀମାରେ ନିଜର ସୈନିକ ଏବଂ ଅସ୍ତ୍ରଶସ୍ତ୍ର ମୁତୟନ ବୃଦ୍ଧି କରିଛି । ସେପଟେ ଚୀନ ସହ ବଢୁଥିବା ତିକ୍ତତାକୁ ଦୃଷ୍ଟିରେ ରଖି ଅନେକ ଦେଶ ଭାରତକୁ ସାହାଯ୍ୟର ହାତ ବଢାଉଛନ୍ତି । ଭାରତର ସୈନ୍ୟଶକ୍ତି ଏବଂ ଅସ୍ତ୍ରଶସ୍ତ୍ର ସଂଖ୍ୟା ବୃଦ୍ଧି କରିବାକୁ ପ୍ରୟାସ କରୁଛନ୍ତି ।
ଗୋଟିଏ ପଟେ ଫ୍ରାନ୍ସ ଆସନ୍ତା ମାସରେ ରାଫେଲ ଯୁଦ୍ଧ ବିମାନ ଭାରତକୁ ହସ୍ତାନର କରିବାକୁ ଥିବା ବେଳେ ଅନ୍ୟପକ୍ଷରେ ଇସ୍ରାଏଲ ଏୟାର ଡିଫେନ୍ସ ସିଷ୍ଟମ ଭାରତକୁ ଦେବାକୁ ନିଷ୍ପତ୍ତି ନେଇଛନ୍ତି । ଏହି କ୍ରମରେ ଆମେରିକା ମଧ୍ୟ ଖୁବ ଶୀଘ୍ର ଭାରତକୁ ତୋପରେ ବ୍ୟବହୃତ ଗୋଳାବାରୁଦ ହସ୍ତାନର କରିବ । ସେପଟେ ଋଷ ମଧ୍ୟ ଭାରତକୁ ଅତ୍ୟାଧୁନିକ ଅସ୍ତ୍ରଶସ୍ତ୍ର ଦେବାକୁ ପ୍ରତିଶୃତି ଦେଇଛି । ଭାରତ ଋଷଠାରୁ 1 ବିଲିୟନ ଡଲାରର ଗୋଳାବାରୁଦ କ୍ରୟ କରିବ ବୋଲି ଜଣାପଡିଛି । ଚୀନ ସହ ବଢୁଥିବା ବିବାଦ ମଧ୍ୟରେ ଦିଲ୍ଲୀରେ ସମସ୍ତ ଦେଶ ସହ ଦ୍ବିପାକ୍ଷିକ ଆଲୋଚନା ସମୟରେ ଏନେଇ ସହମତି ପ୍ରକାଶ ହୋଇଛି ।
ଭାରତ-ଚୀନ ବିବାଦକୁ ଦୃଷ୍ଟିରେ ରଖି କେନ୍ଦ୍ର ସରକାରଙ୍କ ପକ୍ଷରୁ ସଶସ୍ତ୍ରବାହୀନିଙ୍କୁ ପୂର୍ବରୁ ହିଁ ଜରୁରୀକାଳୀନ ଆର୍ଥିକ ଅଧିକାର ଦିଆଯାଇଛି । ଏହା ବ୍ୟତୀତ ଅତ୍ୟାଧୁନିକ ରାଫଏଲ ବିମାନର ପ୍ରଥମ ପର୍ଯ୍ୟାୟ ଜୁଲାଇ 27 ମଧ୍ୟରେ ଭାରତ ପହଞ୍ଚିପାରେ । ଏଥିପାଇଁ 4 ଜଣ ଭାରତୀୟ ପାଇଲଟଙ୍କୁ ପ୍ରଶିକ୍ଷଣ ମଧ୍ୟ ଦିଆଯାଇଛି । ତେବେ ଫ୍ରାନ୍ସ ପ୍ରଥମ ପର୍ଯ୍ୟାୟରେ 8ଟି ଅତିରିକ୍ତ ରାଫେଲ ଯୁଦ୍ଧ ବିମାନ ପଠାଇବ ବୋଲି ଭାରତକୁ କହିଛି ।
ଅନ୍ୟପକ୍ଷରେ କାରଗିଲ ଯୁଦ୍ଧରେ ଭାରତକୁ ସାହାଯ୍ୟ କରିଥିବା ଇସ୍ରାଏଲ ମଧ୍ୟ ଚୀନ-ଭାରତ ବିବାଦକୁ ଦୃଷ୍ଟିରେ ରଖି ଏୟାର ଡିଫେନ୍ସ ସିଷ୍ଟମ ଦେବାକୁ କହିଛି । ଏହାକୁ ଖୁବ ଶୀଘ୍ର ସୀମାରେ ନିୟୋଜିତ କରାଯିବ ବୋଲି ଜଣାପଡିଛି । ତେବେ ଚୀନ ନିଜ ସୀମାରେ ଏସ-400 ଏୟାର ଡିଫେନ୍ସ ସିଷ୍ଟମ ନିୟୋଜିତ କରିଛି । ଯାହାକୁ ଦୃଷ୍ଟିରେ ରଖି ଭାରତ ଇସ୍ରାଏଲଠାରୁ ଏୟାର ଡିଫେନ୍ସ ସିଷ୍ଟମ ଖୁବ ଶୀଘ୍ର ଆଣିବାକୁ ନିଷ୍ପତ୍ତି ନେଇଛି ।
