ତ୍ରିଭେନ୍ଦ୍ରମ: ବିବାଦ ଘେରରେ ଫସିଛନ୍ତି କେରଳର ଆଇଏଏସ୍ ଅଫିସର ଶ୍ରୀରାମ ଭେଙ୍କଟରମଣ । ଏକ ସଡକ ଦୁର୍ଘଟଣାରେ ସାମ୍ବାଦିକଙ୍କ ମୃତ୍ୟୁ ହେବା ପରେ ତେଜିବାରେ ଲାଗିଛି ବିବାଦ । ତେବେ ଘଟଣାରେ ବିଭିନ୍ନ ମହଲରେ ଚର୍ଚ୍ଚା ଜୋର ଧରିଥିବା ବେଳେ ସାମ୍ବାଦିକଙ୍କ ହତ୍ୟା ଉଦ୍ୟମ ଅଭିଯୋଗରେ ଶ୍ରୀରାମଙ୍କୁ ରିମାଣ୍ଡରେ ନେଇଛି ପୋଲିସ ।
ଘଟଣାର ତଦନ୍ତ ଆରମ୍ଭ କରାଯାଇ ପ୍ରଥମେ ଶ୍ରୀରାମଙ୍କ ରକ୍ତ ନମୂନା ସଂଗ୍ରହ କରାଯାଇଛି । ଏହା ଟେଷ୍ଟ ଦ୍ବାରା ଦୁର୍ଘଟଣା ସମୟରେ ଶ୍ରୀରାମ ନିଶାସକ୍ତ ଥିଲେ କି ନାହିଁ ତାହା ଜଣା ପଡିବ । ତେଣୁ ଏହି ରିପୋର୍ଟ ଉପରେ ବର୍ତ୍ତମାନ ସଭିଙ୍କ ନଜର । ତେଣେ ରକ୍ତ ପରୀକ୍ଷାର ରିପୋର୍ଟ ସୋମବାର ଆସିବା ନେଇ ଜଣାପଡିଛି ।
ବର୍ତ୍ତମାନ ସାଧାରଣରେ ଚର୍ଚ୍ଚା ହେଉଛି କି ଦୁର୍ଘଟଣାର ତୁରନ୍ତ ପରେ ରକ୍ତ ନମୂନା ସଂଗ୍ରହ କରାଯିବା ବଦଳରେ ଏତେ ବିଳମ୍ବରେ କାହିଁକି ସଂଗ୍ରହ କରାଯାଇଛି । ଏହାଦ୍ବାରା ରିପୋର୍ଟ ପରିବର୍ତ୍ତନ ହେବାର ସମ୍ଭାବନା ମଧ୍ୟ ଦେଖାଦେଇଛି । ଏଥିସହ ଡ୍ରଗ ସେବନ କରି ଶରୀରରେ ଆଲକହଲର ପରିମାଣ କମାଇବାକୁ ଶ୍ରୀରାମ ଚେଷ୍ଟା କରିଥିବା ମଧ୍ୟ ସନ୍ଦେହ କରାଯାଉଛି । ତେଣୁ ଆଇଏଏସ୍ ଅଫିସରଙ୍କୁ ବଞ୍ଚାଇବାକୁ ଚେଷ୍ଟା କରାଯାଉଛି ବୋଲି ଅଭିଯୋଗ କରିଛନ୍ତି ଲୋକେ ।
ଅନ୍ୟପଟେ ଅଖିଳ ଭାରତୀୟ ସେବା ନିୟମ ଅନୁଯାୟୀ ଆଇଏଏସ୍ ଅଫିସରଙ୍କୁ ରିମାଣ୍ଡରେ ନିଆଯିବାର 48 ଘଣ୍ଟା ମଧ୍ୟରେ ତାଙ୍କୁ ଚାକିରୀରୁ ବରଖାସ୍ତ କରାଯିବା ଦରକାର । ହେଲେ ଏନେଇ ବର୍ତ୍ତମାନ ପର୍ଯ୍ୟନ୍ତ ମୁଖ୍ୟ ଶାସନ ସଚିବଙ୍କ କୌଣସି ପ୍ରତିକ୍ରିୟା ମିଳିପାରିନାହିଁ । ତେଣେ ମୁଖ୍ୟ ଶାସନ ସଚିବଙ୍କ ନିର୍ଦ୍ଦେଶକ୍ରମେ ଶ୍ରୀରାମଙ୍କୁ ମେଡିକାଲ କଲେଜ କିମ୍ବା ସବ୍-ଜେଲ ପଠାଯିବା ସେନେଇ ନିଷ୍ପତ୍ତି ନିଆଯିବ ।
