ନୂଆଦିଲ୍ଲୀ: କରତାରପୁର କରିଡର ମାମଲାରେ ଗୁରୁବାର ବିଦେଶ ମନ୍ତ୍ରଣାଳୟର ମୁଖପାତ୍ର ରବୀଶ କୁମାର ବଡ ବୟାନ ଦେଇଛନ୍ତି । କରତାରପୁର କରିଡର ଆଢୁଆଳରେ ପାକିସ୍ତାନ ଭାରି ମାତ୍ରାରେ ସେବାଶୁଳ୍କ ଶ୍ରଦ୍ଧାଳୁଙ୍କ ଠାରୁ ଆଦାୟ କରି ଲାଭଭାନ ହେବା ପାଇଁ ଚେଷ୍ଟା କରୁଛି ବୋଲି ସେ କହିଛନ୍ତି ।
କରତାରପୁର କରିଡର ନେଇ ଭାରତ-ପାକ ମଧ୍ୟରେ ଅନେକ ବୈଠକରେ ଗୁରୁତ୍ବପୂର୍ଣ୍ଣ ଆଲୋଚନା କରାଯାଇଛି । ଶିଖଧର୍ମକ୍ଷେତ୍ର କର୍ତ୍ତାରପୁର ସାହିବକୁ ଦର୍ଶନ କରିବା ପାଇଁ ଆସୁଥିବା ଶ୍ରଦ୍ଧାଳୁଙ୍କ ଠାରୁ ସେବା ଶୁଳ୍କ ଆଦାୟ ନେଇ ପାକିସ୍ତାନ ଜୋର ଦେବା କାରଣ ଯୋଗୁଁ ଏପର୍ଯ୍ୟନ୍ତ ଏହି କରତାରପୁର କରିଡର ବୁଝାମଣାକୁ ଅନ୍ତିମ ରୂପ ଦିଆଯାଇନଥିବା ସେ କହିଛନ୍ତି । ସେବା ଶୁଳ୍କ ବ୍ୟତିତ ଭାରତ ଅନ୍ୟ ସମସ୍ତ ମୁଦ୍ଦାରେ ଚୁକ୍ତି ସ୍ବାକ୍ଷରିତ କରିବା ପାଇଁ ରାଜି ଥିବା କହିଛନ୍ତି ରବୀଶ କୁମାର ।
ରବୀଶ କୁମାର ଆହୁରି କହିଛନ୍ତି ଯେ, ପାକିସ୍ତାନ ସମସ୍ତ ଶ୍ରଦ୍ଧାଳୁଙ୍କ ଠାରୁ 20 ଡଲାର, ଭାରତୀୟ ମୁଦ୍ରାରେ 1420 ଟଙ୍କା ସେବା ଶୁଳ୍କ ଲାଗୁ କରିବା ପାଇଁ ଜୋର ଦେଉଛି । ପାକିସ୍ତାନ ଭକ୍ତଙ୍କ ହିତରେ ଭାରତ ଏହି ପ୍ରସ୍ତାବ ପ୍ରତି ଅନାଗ୍ରହ ପ୍ରକାଶ କରିଛି । ଏହି କରିଡର ଏକ P2P ପଦକ୍ଷେପ । ଏହାସହ ଭାରତ ଏହି ମହାନ ଆୟୋଜନ ପାଇଁ ସଠିକ ସମୟରେ ଚୁକ୍ତି ସମାପନ ଓ ହସ୍ତାକ୍ଷର କରାଯିବା ନେଇ ଆଶାବ୍ୟକ୍ତ କରିଥିବା କଥା ସେ କହିଛନ୍ତି ।
ଏଠାରେ ସୂଚନା ଯୋଗ୍ୟ ଯେ, ଆସନ୍ତା ନଭେମ୍ବର ୮ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେରା ବାବା ନାନକସ୍ଥିତ ଦରବାର ସାହିବ ଗୁରୁଦ୍ବାରକୁ ପାକିସ୍ତାନର କରତାରପୁର ସାହିବକୁ ସଂଯୋଗ କରୁଥିବା ୪.୫ କିମି ଦୂରତା ବିଶିଷ୍ଟ କରତାରପୁର କରିଡରକୁ ଉଦ୍ଘାଟନ କରିବେ ।
