କରାଚି: ସୋମବାର ସକାଳେ ଆତଙ୍କୀ ଗୁଳିରେ ଥରିଛି ପାକିସ୍ତାନ । କରାଚିସ୍ଥିତ ପାକିସ୍ତାନ ଷ୍ଟକ୍ ଏକ୍ସଚେଞ୍ଜ ବିଲ୍ଡିଂ ଉପରେ ଆତଙ୍କୀ ଆକ୍ରମଣ ହୋଇଛି । ଏହି ଆତଙ୍କୀ ଆକ୍ରମଣରେ ସମ୍ପୃକ୍ତ ଚାରିଜଣ ଆତଙ୍କବାଦୀ ସୁରକ୍ଷାକର୍ମୀଙ୍କ ଗୁଳିରେ ପ୍ରାଣ ହରାଇଛନ୍ତି । ପୋଲିସ ଅଧିକାରୀଙ୍କ ସୂଚନା ମୁତାବକ ଏହି ଅପରେସନରେ ଜଣେ ସବ-ଇନ୍ସପେକ୍ଟର ଏବଂ ଚାରିଜଣ ସୁରକ୍ଷାକର୍ମୀ ପ୍ରାଣ ହରାଇଛନ୍ତି ।
ପ୍ରାଥମିକ ରିପୋର୍ଟରୁ ଜଣାପଡିଛି ଯେ, 4 ଆତଙ୍କୀ କାରରେ ଆସିଥିଲେ । ଏହାପରେ 4ଆତଙ୍କୀ ଷ୍ଟକ୍ ଏକ୍ସଚେଞ୍ଜ କୋଠାରେ ମୁଖ୍ୟଦ୍ବାର ଉପରେ ଗ୍ରେନେଡ ମାଡ କରିଥିଲେ । ପରେ ପରେ ଆରମ୍ଭ କରିଥିଲେ ଆଖିବୁଜା ଗୁଳିମାଡ କରି ଭିତରକୁ ପ୍ରବେଶ କରିଥିଲେ ।
ଏହି ଆକ୍ରମଣରେ ଏପର୍ଯ୍ୟନ୍ତ ମୋଟ 9 ଜଣଙ୍କର ମୃତ୍ୟୁ ଘଟିଛି। ଏଥିରେ 4 ଜଣ ଆତଙ୍କବାଦୀ, 4 ଜଣ ସୁରକ୍ଷାବାହିନୀ ଏବଂ 1 ଜଣ ପୋଲିସ ସବ-ଇନ୍ସପେକ୍ଟର ରହିଛନ୍ତି । ଏଥିସହିତ 7-8 ଜଣ ଆହତ ହୋଇଥିବା ଖବର ରହିଛି । ଆତଙ୍କୀ ଆକ୍ରମଣ ସମୟରେ ଏକ୍ସଚେଞ୍ଜ ମଧ୍ୟରେ ଥିବା ଲୋକଙ୍କୁ ବିଲ୍ଡିଂ ଭିତର ପଛ ଦ୍ବାର ଦେଇ ବାହାରକୁ ବାହାର କରାଯାଇଥିଲା ।
ସିନ୍ଧ ରେଞ୍ଜର୍ସଙ୍କ ଅନୁଯାୟୀ ପାକିସ୍ତାନର ଷ୍ଟକ୍ ଏକ୍ସଚେଞ୍ଜରେ ପ୍ରବେଶ କରିଥିବା ଚାରିଜଣ ଆତଙ୍କବାଦୀଙ୍କୁ ହତ୍ୟା କରାଯାଇଛି। ଏହାସହ ଘଟଣାସ୍ଥଳରୁ ଗ୍ରେନେଡ, ଗୁଳି ଓ ଅସ୍ତ୍ରଶସ୍ତ୍ର ଜବତ କରାଯାଇଛି ।
ଷ୍ଟକ୍ ଏକ୍ସଚେଞ୍ଜର ଏହି କୋଠା 8 ରୁ 10 ମହଲା ବିଶିଷ୍ଟ ।ଏଥିରେ ଷ୍ଟକ୍ ମାର୍କେଟ୍, ବ୍ୟବସାୟ ସହିତ ଜଡିତ ସମସ୍ତ ବିଭାଗ ରହିଛି । ଆତଙ୍କୀ ଆକ୍ରମଣ ସମୟରେ ସେଠାରେ ବହୁ ସଂଖ୍ୟକ ଲୋକ ଉପସ୍ଥିତ ଥିଲେ ।
ଏହି ଆତଙ୍କୀ ଆକ୍ରମଣ ପରେ ସିନ୍ଧ୍ ରାଜ୍ୟପାଳ ଇମ୍ରାନ୍ ଇସ୍ମାଇଲ୍ ଏହାକୁ କଡା ନିନ୍ଦା କରିଛନ୍ତି । ଯେକୌଣସି ସ୍ଥିତିରେ ସିନ୍ଧକୁ ସୁରକ୍ଷାପ୍ରଦାନ କରାଯିବ ବୋଲି ସେ କହିଛନ୍ତି ।
ଏହି ଆତଙ୍କୀ ଆକ୍ରମଣରେ ବର୍ତ୍ତମାନ ସୁଦ୍ଧା କୌଣସି ଆତଙ୍କୀ ସଂଗଠନ ନିଜକୁ ଦାୟୀ କରିନାହାଁନ୍ତି ।
@IANS
