ଭୋପାଳ: ମଧ୍ୟପ୍ରଦେଶର ଭିଣ୍ଡ ଜିଲ୍ଲାର ଲହାର ବିଧାନସଭା ନିର୍ବାଚନୀ ମଣ୍ଡଳୀରେ ସୋମବାର ଜଣେ ସାମ୍ବାଦିକଙ୍କୁ ମାଡ଼ ମରାଯାଇଥିବା ଅଭିଯୋଗ ହୋଇଛି । ମୁଖାପିନ୍ଧା 4 ଦୁର୍ବୃତ୍ତ ତାଙ୍କୁ ମାଡ଼ ମାରିଥିବା ସେ ଅଭିଯୋଗ କରିଛନ୍ତି । ଅଭିଯୋଗ ପାଇବା ପରେ ପୋଲିସ 6 ଜଣଙ୍କୁ ଅଟକ ରଖି ପଚରାଉଚୁରା ଜାରି ରଖିଥିବା ଜଣାପଡ଼ିଛି ।
ମିଳିଥିବା ସୂଚନା ମୁତାବକ ସ୍ଥାନୀୟ ଅଞ୍ଚଳର ସାମ୍ବାଦିକ ରିପୁ ଦମନ ସିଂ ସୋମବାର ପରିବା ବଜାର ଯାଉଥିବା ସମୟରେ ତାଙ୍କୁ ଦୁଇ ଜଣ ମୁଖାପିନ୍ଧା ବ୍ୟକ୍ତି ଘେରି ଯାଇଥିଲେ । ପରେ ରିପୁଙ୍କୁ ନିର୍ଦ୍ଧୁମ ମାଡ଼ ମାରିଥିଲେ ଉକ୍ତ ଦୁଇ ଦୁର୍ବୃତ୍ତ । ତେବେ ଅଭିଯୁକ୍ତମାନଙ୍କ ପରିଚନ ନ ମିଳିବା ପାଇଁ ସେମାନେ ମୁହଁରେ କପଡ଼ା ବାନ୍ଧିଥିବା ରିପୁ କହିଛନ୍ତି ।
ଘଟଣା ପରେ ସେଠାରୁ ଦୁର୍ବୃତ୍ତମାନେ ଫେରାର ହୋଇଯାଇଥିବା ଜଣାପଡ଼ିଛି । ସେପଟେ ଏହି ଘଟଣା ପରେ ରିପୁ ସ୍ଥାନୀୟ ଥାନାରେ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ପୋଲିସ ତଦନ୍ତ ଆରମ୍ଭ କରିଛି । ପ୍ରାଥମିକ ପର୍ଯ୍ୟାୟରେ ପୋଲିସ 5 ଜଣଙ୍କ ବିରୋଧରେ ମାମଲା ରୁଜୁ କରି ପୋଲିସ ତଦନ୍ତ ଆରମ୍ଭ କରିଛି ।
ସେପଟେ ରିପୁ କହିଛନ୍ତି ପୋଲିସ ଅଭିଯୁକ୍ତମାନଙ୍କୁ ଗିରଫ କରିବା ବଦଳରେ ସେମାନଙ୍କ ରାଜନୈତିକ ପୃଷ୍ଠଭୂମୀ ଖୋଜିବାରେ ବ୍ୟସ୍ତ ରହିଛି ପୋଲିସ । ତେବେ ଏହି ଘଟଣାର ଏକ ଭିଡ଼ିଓ ଭାଇରାଲ ହେବାରେ ଲାଗିଛି ।
