ମୁମ୍ବାଇ: ଦିଲ୍ଲୀସ୍ଥିତ ଜବାହାରଲାଲ ନେହେରୁ ବିଶ୍ବବିଦ୍ୟାଳୟ(ଜେଏନୟୁ) କ୍ୟାମ୍ପସରେ ଛାତ୍ରଛାତ୍ରୀଙ୍କୁ ଆକ୍ରମଣକୁ ଦେଶର ବିଭିନ୍ନ ପ୍ରାନ୍ତରେ ବିରୋଧ ପ୍ରଦର୍ଶନ ଦେଖିବାକୁ ମିଳିଛି। ମୁମ୍ବାଇରେ ଗେଟ୍-ୱେ ଅଫ୍ ଇଣ୍ଡିଆ ଠାରେ ବିକ୍ଷୋଭକାରୀ ଏକାଠି ହୋଇ ବିରୋଧ ପ୍ରଦର୍ଶନ କରିଛନ୍ତି। ସେମାନଙ୍କ ପାଖରେ ‘ଫ୍ରି କାଶ୍ମୀର’ ପୋଷ୍ଟର ଥିବାର ଦେଖିବାକୁ ମିଳିଛି।
ଅନ୍ୟପକ୍ଷେ ବ୍ୟାନର ଧରିଥିବା ଛାତ୍ରୀ ଏନେଇ ନିଜ ପକ୍ଷ ରଖିଛନ୍ତି । ଜମ୍ମୁ-କାଶ୍ମୀରରେ ଲାଗିଥିବା ପ୍ରତିବନ୍ଧକକୁ ହଟାଇବା ପାଇଁ ‘ଫ୍ରି କାଶ୍ମୀର’ ଲେଖିଛି ।
ଆଜାଦୀର ନାରା ଲଗାଇବା ସହ ‘କାଶ୍ମୀର ଫ୍ରି’ ବ୍ୟାନରକୁ ଆନ୍ଦୋଳନ ଚାଲିଥିବା ସମୟରେ ପ୍ରଦର୍ଶନ କରିଛନ୍ତି ବିକ୍ଷୋଭକାରୀ। ପ୍ରଧାନମନ୍ତ୍ରୀ ମୋଦି ଓ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ନେଇ ମଧ୍ୟ ବିରୋଧ ପ୍ରଦର୍ଶନ କରାଯାଇଛି। କେବଳ ମୁମ୍ବାଇ ନୁହେଁ ବରଂ ପଶ୍ଚିମବଙ୍ଗର ଯାଦବପୁର ବିଶ୍ବବିଦ୍ୟାଳୟ, ଚେନ୍ନାଇରେ ମଧ୍ୟ ଏନେଇ ପ୍ରତିବାଦ କରାଯାଇଛି।
ଅନ୍ୟପକ୍ଷେ ବିଜେପି ନେତା କିରୀଟ ସୌମେୟା ଏହାକୁ ନେଇ ପୋଲିସ ପାଖରେ ଏକ ମାମଲା ରୁଜୁ କରିଛନ୍ତି ଓ ଖୁବ ଶୀଘ୍ର ଏହାର କାର୍ଯ୍ୟାନୁଷ୍ଠାନ କରାଯିବ ବୋଲି ପୋଲିସ ପକ୍ଷରୁ ସୂଚନା ମିଳିଛି । ଗତ ରବିବାର ଜେଏନୟୁ କ୍ୟାମ୍ପସରେ କିଛି ମୁଖାଧାରୀ ଛାତ୍ର ପ୍ରବେଶ କରି ବିଶ୍ବବିଦ୍ୟାଳୟର ଅନ୍ୟ ଛାତ୍ରଙ୍କୁ ଆକ୍ରମଣ କରିବା ଆରମ୍ଭ କରିଥିଲେ। ଏଥିରେ ପ୍ରାୟ 23 ଜଣ ଆହତ ହୋଇଥିଲେ।
