ବେଙ୍ଗାଲୁରୁ: ନିର୍ବାଚନ ପ୍ରଚାର ସମୟରେ ପ୍ରଧାନମନ୍ତ୍ରୀ ମୋଦିଙ୍କ ଉପରେ ବିବାଦୀୟ ମନ୍ତବ୍ୟ ଦେଇଛନ୍ତି ଜେଡିଏସ ବିଧାୟକ ଶିଭଲିଙ୍ଗ୍ ଗୌଡା। ମୋଦି ସମର୍ଥକଙ୍କୁ ଟାର୍ଗେଟ କରି ସେ ଏମାନଙ୍କ ମୁହଁ ଫଟାଇଦେବାକୁ କହିଛନ୍ତି। ବିଶେଷ କରି ଯେଉଁମାନେ ମୋଦି ନାମ ଜପ କରୁଛନ୍ତି ସେମାନଙ୍କୁ ମାଡ ମାରିବାକୁ ସେ କହିଛନ୍ତି।
ହସନର ଅର୍ସିକେରାରେ ଏକ ସଭାକୁ ସମ୍ବୋଧନ କରିବା ସମୟରେ ସେ ଏପରି ମନ୍ତବ୍ୟ ଦେଇଛନ୍ତି। ଗୌଡା କହିଛନ୍ତି ଯେ ମୋଦି ମୋଦି କହି ଭୋଟ ମାଗୁଥିବା ଲୋକଙ୍କୁ ମାଡ ମାର। ସେମାନଙ୍କୁ ମୁଥା ମାରି ତାଙ୍କ ମୁହଁ ଫଟାଇଦିଅ। ଲୋକଙ୍କ ପାଇଁ କାମ ନକରି ଏମାନେ କେବଳ ମୋଦି ମୋଦି ଜପୁଛନ୍ତି । ଏମାନଙ୍କୁ ଶକ୍ତ ଚଟକଣା ମାର ବୋଲି ସେ ଲୋକଙ୍କୁ ପରାମର୍ଶ ଦେଇଥିଲେ।
ଏହାସହ କେହି 15 ଲକ୍ଷ ଟଙ୍କା ପାଇଛ କି ବୋଲି ସେ ଉପସ୍ଥିତ ଲୋକଙ୍କୁ ପଚାରିଥିଲେ। ସେ କହିଥିଲେ ଯେ କୌଣସି ବିଜେପି ନେତା ଆସିଲେ ତାଙ୍କୁ ମୋଦିଙ୍କ ପ୍ରତିଶ୍ରୁତି ବିଷୟରେ ପଚାରିବ । 2014ରେ ମୋଦି ଯେତେବେଳେ କ୍ଷମତାକୁ ଆସିଲେ ସେତେବେଳେ ବହୁ ପ୍ରତିଶ୍ରୁତି ଦେଇଥିଲେ । କିନ୍ତୁ ଆଜି ପର୍ଯ୍ୟନ୍ତ ଗୋଟିଏ ବି ପୁରଣ ହୋଇନାହିଁ।
ଉଲ୍ଲେଖଯୋଗ୍ୟ ଯେ କଂଗ୍ରେସ ସହ ମେଣ୍ଟ କରି ଶାସକ ଜେଡିଏସ ଏଥର ନିର୍ବାଚନ ମୈଦାନକୁ ଓହ୍ଲାଇଛି। ଏନେଇ ଉଭୟଙ୍କ ମଧ୍ୟରେ ଆସନ ବୁଝାମଣା ମଧ୍ୟ ହୋଇସାରିଛି। କର୍ଣ୍ଣାଟକରେ 2ୟ ପର୍ଯ୍ୟାୟ ଲୋକସଭା ନିର୍ବାଚନ ଏପ୍ରିଲ 18ରେ ହେବ। ଏହାପରେ 3ୟ ପର୍ଯ୍ୟାୟରେ ମଧ୍ୟ ଏଠାରେ ଏପ୍ରିଲ 23ରେ ନିର୍ବାଚନ ହେବ।
