ଶ୍ରାନଗର: ଜମ୍ମୁ-କାଶ୍ମୀରର ଶ୍ରୀନଗର ସ୍ଥିତ ସଚିବାଳୟରେ ଫରଫର ହୋଇ ଉଡିଲା ତ୍ରିରଙ୍ଗା । ଜମ୍ମୁ କଶ୍ମୀରରୁ ଧାରା ୩୭୦ ଉଚ୍ଛେଦ ହେବା ପରେ ସଚିବାଳୟରୁ ପ୍ରଦେଶର ସ୍ବତନ୍ତ୍ର ପତାକାକୁ ହଟାଇ କେବଳ ଜାତୀୟ ପତାକାକୁ ସ୍ଥାନ ଦିଆଯାଇଛି । ଗତ ଦୁଇ ସପ୍ତାହ ହେବ ସେଠାରେ ଉଭୟ ତ୍ରିରଙ୍ଗା ଏବଂ ପ୍ରଦେଶର ସ୍ବତନ୍ତ୍ର ପତାକା ଲଗାଯାଇଥିଲା । ତେବେ ବର୍ତ୍ତମାନ ସେଠାକାର ସମସ୍ତ ସରକାରୀ କାର୍ଯ୍ୟାଳୟରେ ମଧ୍ୟ ଜାତୀୟ ପତାକା ଲଗାଯିବ ବୋଲି ଜଣେ ଅଧିକାରୀ କହିଛନ୍ତି ।
ପୂର୍ବରୁ ଜମ୍ମୁ-କାଶ୍ମୀରର ସ୍ବତନ୍ତ୍ର ସମ୍ବିଧାନ, ପତାକା ଏବଂ ଦଣ୍ଡ ସଂହିତା ଥିଲା । ଜମ୍ମୁ-କାଶ୍ମୀରର ପତାକା ଲାଲ୍ ରଙ୍ଗର ଥିଲା ଏବଂ ସେଠାରେ କାଶ୍ମୀର ଘାଟି, ଜମ୍ମୁ ଏବଂ ଲଦାଖକୁ ଦର୍ଶାଇବା ପାଇଁ ତିନୋଟି ଗାର କଟାଯାଇଥିଲା । ଏହା ସହିତ ଏହି ପତାକାରେ ହଳର ଚିତ୍ର ଥିଲା ଯାହା ରାଜ୍ୟର ଚାଷୀଙ୍କୁ ପ୍ରତିନିଧିତ୍ବ କରୁଥିଲା । ଏହା ଜମ୍ମୁ-କାଶ୍ମୀର ପାଇଁ ସ୍ବତନ୍ତ୍ର ପରିଚୟ ସୃଷ୍ଟି କରୁଥିଲା । 1952 ରେ ଜମ୍ମୁ-କାଶ୍ମୀର ରାଜ୍ୟର ସମ୍ବିଧାନ ସଭା ଏହି ପତାକାକୁ ନିଜର ଅଧିକାରୀକ ପତାକା ରୂପରେ ଗ୍ରହଣ କରିଥିଲା ।
ତେବେ ଅନୁଚ୍ଛେଦ 370 ଉଚ୍ଛେଦ ପରେ ବର୍ତ୍ତମାନ ସେଠାରେ କେବଳ ଭାରତୀୟ ସମ୍ବିଧାନ ଲାଗୁ ହେବ । ସରକାରୀ କାର୍ଯ୍ୟାଳୟରେ କେବଳ ତ୍ରିରଙ୍ଗା ଉଡିବ ଏବଂ ଭାରତୀୟ ଦଣ୍ଡ ସଂହିତାର ପାଳନ ହେବ । ପୂର୍ବରୁ ରାଜ୍ୟରେ କୌଣସି ବାହାର ବ୍ୟକ୍ତିଙ୍କୁ ଜମି କିଣିବାର ଅଧିକାର ନଥିଲା । କିନ୍ତୁ ଏବେ ସେହି ପ୍ରାବଧାନକୁ ମଧ୍ୟ ଶେଷ କରାଯାଇଛି ।
