ନୂଆଦିଲ୍ଲୀ: ଦିନକୁ ଦିନ ବଢିଚାଲିଛି ଅନଲାଇନ ଅସଦାଚରଣ ଓ ଅପରାଧର ମାତ୍ରା । ସୋସିଆଲ ମିଡିଆକୁ ଲୋକେ ନିଜ ଦୁନିଆ ଭାବି ସାରିଥିବା ବେଳେ ଏହି ପ୍ଲାଟଫର୍ମର ଦୁରୁପଯୋଗ କରି ଅନେକ ଲୋକେ ଅନଲାଇନ ଗାଳିଗୁଲଜ କରିବା ସହ ଅସଦାଚରଣ କରୁଥିବା ଦେଖିବାକୁ ମିଳୁଛି । ଏହାକୁ ରୋକିବା ସହ ସୋସିଆଲ ମିଡିଆ ପ୍ଲାଟଫର୍ମକୁ ସକାରାତ୍ମକ ରୂପ ଦେବା ପାଇଁ ଚେଷ୍ଟା କରିଛି ଇନଷ୍ଟାଗ୍ରାମ । ଏନେଇ ରୋଲ ଆଉଟ ହେଇଛି ନୂଆ ଫିଚର ।
ଏହି ନୂଆ ଫିଚର ସାହାଯ୍ୟରେ ଜଣେ ୟୁଜର ନିଜ ପେଜରେ ନେଗେଟିଭ କମେଣ୍ଟକୁ ସାମୂହିକ ଭାବେ ଡିଲିଟ କରିବା ସହ ସମ୍ପୃକ୍ତ ୟୁଜରକୁ ବ୍ଲକ ଓ ରିପୋର୍ଟ ମଧ୍ୟ କରିପାରିବ । ରବିବାର ଏନେଇ ସୂଚନା ଦେଇଛି କମ୍ପାନୀ । ତେବେ ଆଇଓଏସ ୟୁଜର୍ସ ଏଥିପାଇଁ ନିଜ କମେଣ୍ଟରେ କ୍ଲିକ କରିବା ପରେ ଡାହାଣ ପାର୍ଶ୍ବ ଟପ୍ରେ ଦେଖାଯାଉଥିବା ତିନୋଟି ଡଟ ଉପରେ କ୍ଲିକ କରିପାରିବେ । ସେଠାରେ ମ୍ୟାନେଜ କମେଣ୍ଟ ଅପ୍ସନକୁ ଯାଇ ଆପଣ ଏକସାଥୀରେ 25ଟି କମେଣ୍ଟକୁ ସିଲେକ୍ଟ କରିପାରିବେ । ଏହାପରେ ଏହି କମେଣ୍ଟଗୁଡିକୁ ଆପଣ ଡିଲିଟ କରିପାରିବେ ।
ଆଣ୍ଡ୍ରଏଡ ୟୁଜର୍ସଙ୍କ ପାଇଁ ଏପର୍ଯ୍ୟନ୍ତ ଏହି ଫିଚର ରୋଲ ଆଉଟ ହୋଇ ନଥିବା ବେଳେ ଖୁବଶୀଘ୍ର ଏହା ମଧ୍ୟ ଉପଲବ୍ଧ ହେବ ବୋଲି କମ୍ପାନୀ ସ୍ପଷ୍ଟ କରିଛି । କେବଳ ସେତିକି ନୁହେଁ ଆଗକୁ ଆଉ କିଛି ନୂଆ ଫିଚର ସହ ଇନଷ୍ଟାଗ୍ରାମ ଟ୍ୟାଗ ଓ ମେନସନ୍ସକୁ ନିୟନ୍ତ୍ରଣ କରିବ ବୋଲି ଜଣାପଡିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
