ନୂଆଦିଲ୍ଲୀ: ଦିନକୁ ଦିନ ବୃଦ୍ଧି ପାଉଛି ଭାରତ-ପାକିସ୍ତାନ ସୀମାରେ ଅସ୍ତ୍ରବୀରତି ଉଲଙ୍ଘନ । ଏଭଳି ସୂଚନା ଦେଇଛନ୍ତି ପ୍ରତିରକ୍ଷା ରାଜ୍ୟମନ୍ତ୍ରୀ ଶ୍ରୀପାଦ ନାଏକ । ରାଜ୍ୟସଭାରେ ସେ କହିଛନ୍ତି କି 2018 ମସିହାରେ 1629 ଥର ଭାରତ-ପାକିସ୍ତାନ ସୀମାରେ ଅସ୍ତ୍ରବୀରତି ଉଲଙ୍ଘନ ହୋଇଛି । ଯେତେବେଳେ କି 2019 ଜୁନ ସୁଦ୍ଧା 1299 ଥର ଅସ୍ତ୍ରବୀରତି ଉଲଙ୍ଘନ ହୋଇଛି ।
ଗୋଟିଏ ପ୍ରଶ୍ନର ଲିଖିତ ଉତ୍ତରରେ ନାଏକ କହିଛନ୍ତି, ପାକିସ୍ତାନର ଅସ୍ତ୍ରବିରତି ଉଲଙ୍ଘନର ଜବାବ ସମ୍ପୂର୍ଣ୍ଣ ଭାବେ ଭାରତୀୟ ଯବାନ ଦେଉଛନ୍ତି । ପାକିସ୍ତାନର ବରିଷ୍ଠ ଅଧିକାରୀ ତଥା ସେନା ଅଧିକାରୀଙ୍କ ନିକଟରେ ଯଥୋଚିତ ମାଧ୍ୟମରେ ଏହି ପ୍ରସଙ୍ଗକୁ ଉଠାଯାଉଛି ।
ସେହିପରି ଆଉ ଏକ ପ୍ରଶ୍ନର ଲିଖିତ ଉତ୍ତରରେ ନାଏକ କହିଛନ୍ତି, ଜମ୍ମୁ-କାଶ୍ମୀରରେ ଆତଙ୍କବାଦୀଙ୍କୁ ରୋକିବା ଅଭିଯାନରେ 2016 ମସିହାରେ 49 ଜଣ ଯବାନ ଶହୀଦ ହୋଇଛନ୍ତି । 2017ରେ ଏହି ଅଭିଯାନରେ ଶହୀଦ ହେଉଥିବା ଯବାନଙ୍କ ସଂଖ୍ୟା 31 ଏବଂ 2018ରେ 29 ଥିଲା । ସେନା-ଆତଙ୍କବାଦୀ ମଧ୍ୟରେ ଯୁଦ୍ଧ ଏବଂ ଅସ୍ତ୍ରବୀରତି ଉଲଙ୍ଘନର ଗଭୀରତାକୁ ବିଶ୍ଳେଷଣ କରିଛନ୍ତି ନାଏକ ।
