ନୂଆଦିଲ୍ଲୀ : ଭାରତ-ଚୀନ ସୀମା ବିବାଦ ମଧ୍ୟରେ ଭାରତର ପ୍ରମୁଖ ଗୁପ୍ତଚର ସଂଗ୍ରହ ଉପଗ୍ରହ ଏମିସାଟ୍ ତିବ୍ଦତରେ ଚୀନ ପିପୁଲ୍ସ ଲିବରେସନ୍ ଆର୍ମି ଉପରେ କଡା ନଜର ରଖିଛି । ଚୀନ ସୈନିକଙ୍କ ସ୍ଥିତିକୁ ସେ ଭଲ ଭାବରେ ଅନୁଧ୍ୟାନ କରିଥିବା ଜଣାପଡିଛି । ଏହି ଉପଗ୍ରହ ପ୍ରତିରକ୍ଷା ଅନୁସନ୍ଧାନ ଏବଂ ବିକାଶ ସଂଗଠନ(ଡିଆରଡିଓ) ଦ୍ବାରା ପରିଚାଳିତ ହେଉଛି ।
ଏହି ଉପଗ୍ରହ ଇଲେକ୍ଟ୍ରୋନିକ୍ ଇଣ୍ଟେଲିଜେନ୍ସ ପ୍ୟାକେଜ୍ ବହନ କରେ । ଯାହାର କ୍ଷମତାକୁ ସୈନ୍ୟ ଉଦ୍ଦେଶ୍ୟ ପାଇଁ ଅପରେଶନରେ ବ୍ୟବହାର କରାଯାଏ । ତେବେ ଶନିବାର ଏହି ଉପଗ୍ରହ ଅରୁଣାଚଳ ପ୍ରଦେଶ ନିକଟସ୍ଥ ତିବ୍ଦତରେ କବ୍ଜା କରିଥିବା ଚୀନ ସୈନିକଙ୍କ ଶିବିର ଦେଇ ଗତି କରିଥିଲା । ଏନେଇ ଏକ ସରକାରୀ ସୂତ୍ରରୁ ପ୍ରକାଶ ପାଇଛି ।
ଭାରତୀୟ ମହାକାଶ ଗବେଷଣା କେନ୍ଦ୍ର (ଇସ୍ରୋ) ଦ୍ୱାରା ନିର୍ମିତ ଏମିସାଟ୍ର ଇଲେକ୍ଟ୍ରୋନିକ୍ ଇଣ୍ଟେଲିଜେନ୍ସ ମିଶନ୍ ରେଡିଓ ସିଗନାଲ୍ ଉପରେ ନଜର ରଖେ । ଯାହା ଶତ୍ରୁ ଅଞ୍ଚଳରେ ପ୍ରସାରଣର ସମସ୍ତ ଉତ୍ସର ପ୍ରକୃତି ଏବଂ ସ୍ଥାନ ନିର୍ଣ୍ଣୟ କରିବା ପାଇଁ ବ୍ୟବହୃତ ହୁଏ ।
ସୂତ୍ର ଅନୁଯାୟୀ, ଚୀନ ସୈନ୍ୟମାନେ ଡେପସଙ୍ଗ ସେକ୍ଟରରେ ଏକତ୍ରିତ ହୋଇଛନ୍ତି । ଚୀନ ସେନା 2013 ରେ ମଧ୍ୟ ଡିପସଙ୍ଗରେ ପ୍ରବେଶ କରିଥିଲା । ନିକଟରେ ଭାରତୀୟ ରାଡାର ଅନୁସନ୍ଧାନ ଉପଗ୍ରହ ରିସାଟ୍-2ବିଆର1 ଆଫ୍ରିକାର ହର୍ନର ଜିବୁଟିରେ ଚୀନ ନୌସେନାର ଶିବିର ଦେଇ ଗତି କରିଥିଲା ।
ସେହିପରି ଜୁଲାଇ 11 ରେ ଏମିସାଟ୍ର ଇଲେକ୍ଟ୍ରୋନିକ୍ ଇଣ୍ଟେଲିଜେନ୍ସ ମିଶନ୍ ପାକିସ୍ତାନ ନୌସେନାର ଓରମାରା ବେସ ନିକଟରେ ଗତି କରିଥିଲା । ଏହି ବେସରେ ବୁଡ଼ାଜାହାଜ ଲୁଚି ରହିବାର ସୁବିଧା ମଧ୍ୟ ରହିଛି ।
ଯଦିଓ ପ୍ରକୃତ ନିୟନ୍ତ୍ରଣ ରେଖାରେ ବିବାଦକୁ ନେଇ ଭାରତ ଏବଂ ଚୀନ ମଧ୍ୟରେ ଆଲୋଚନା ଜାରି ରହିଛି । ତଥାପି ଲଦାଖ ଏବଂ କାଶ୍ମୀରରେ ପାକିସ୍ତାନ ଏବଂ ଚୀନ ଆସନ୍ତା ଶୀତ ସମୟରେ ଭାରତ ବିରୋଧରେ ଯୁଦ୍ଧ ପାଇଁ ପ୍ରସ୍ତୁତ ହେଉଛନ୍ତି ବୋଲି କଳ୍ପନାଜଳ୍ପନା ଚାଲିଛି ।
